Actualités

Zon’ny voafonja Tsy mbola voahaja eto Madagasikara

Actualités
Alarobia 19 Jolay 2017

Tsy mbola voahaja ny zon’ny voafonja eto amintsika amin’ny ankapobeny.

Ankoatra ny trano onenan’izy ireo dia anisan’ny olana ny fandraisana an-tanana sy ny fikarakarana azy ireny manomboka any amin’ny fakana am-bavany ka hatrany am-ponja. Mba hanajana ny zon’izy ireny dia nanamafy sy nampahafantatra ny zandarimariam-pirenena momba ny fanajana ny zon’olombelona, indrindra fa ireo voafonja ho an’ireo voakasik’izany tetsy amin’ny DLC Anosy omaly ny komitin’ny Croix rouge iraisam-pirenena. Borigadin’ny zandarimariam-pirenena miisa 650 sy zandary am-perinasa miisa 13.000 eto Antananarivo no ezahina hahazo tombontsoa ho fiarovana ny zon’ny voafonja. Zavatra efatra loha no niompanan’ny fiofanana toy ny fomba fisamboran’olona, ny fakana am-bavany, indrindra ny fandraisana an-tanana ireo olona marefo toy ny vehivavy sy ny ankizy hiharan’ny herisetra. Nampahafantarina koa ny andraikitra tokony horaisin’ny mpitandro ny filaminana manoloana sy aorian’ny fitsaram-bahoaka mety mitranga amina toerana iray izay tena nahazo vahana tokoa teto amintsika. Hisy moa ny famadihana izao lalàna momba ny zon’olombelona iraisam-pirenena izao amin’ny teny Malagasy ary ezahina hozaraina amin’ny zandarimariam-pirenena rehetra eto Madagasikara mba hahafahan’izy ireo manatontosa ny asany an-tsakany sy an-davany.

Pati