Actualités

Zanaray Miraindraiky Ny firaisankinan’ny Antesaka no laharam-pahamehana

Actualités
Alakamisy 15 Martsa 2018

Fahombiazana ! Izay raha fehezina ny fihaonana voalohany ho an’ny taona 2018 ho an’ireo terak’Antesaka mivondrona ao anatin’ny fikambanana Zanaray Miraindraiky teny amin’ny CNaPS Vontovorona.

Nahatonga solontena avokoa ireo distrika telo avy any Atsimo Atsinanan’ny Nosy iny, dia i Vangaindrano, Midongy ary Befotaka ary ireo Zanaray avy amin’ny faritany ivelan’Antananarivo toa an’Antsiranana sy Mahajanga. Nanafana ny lanonana i Lola izay mpanakanto avy any amin’iny faritra iny, notronin’i Vanessa ary ny artista toa an-dry Refamo Vangaindrano. Nanome voninahitra ny fotoana ireo Raiamandreny mpitondra fanjakana na ny teo aloha na ny ankehitriny. Omby efatra no novonoina teny Vontovorona. Nanentana ny Zanaray hijery lavidavitra kokoa ho amin’ny fampandrosoana ny faritra iraisana fa tsy ho lany andro amin’ny fifanenjehana an-toerana fotsiny ny sekretera jeneralin’ny fikambanana Atoa Rakotomila nandritra ny lahateny nataony. Ny filohan’ny fikambanana Atoa Jean Marie kosa dia nampahafantatra ny rehetra ireo mpikambana mandrafitra ny birao izay ahitana jeneraly maromaro, tale mpitantana orinasa sy tompon’andraikitra ambony eto amin’ny firenena. Nampanantena kosa ny mpikambana solontenan’ny avy any amin’ny faritany fa vonona hanamafy ny firaisankina izay voizin’ny foibe ary nisaotra manokana ny filoham-boninahitry ny fikambanana dia ny jeneraly Tsaranazy Jean Emile.

RTT