Actualités

Tsy fandriampahalemana, trafika samihafa � Tadindomin-doza i Madagasikara

Actualités
Alarobia 19 Septambra 2012

�Ny zavatra mitranga tato ho ato dia efa taratra fa tsy hisy fifidianana hadio eto�, hoy i Camille Mektoub.

Notanisainy moa ny zava-nitranga nanomboka tamin’ny fifidianana izay hitondra ny FJKM tany Manakara, ny FLM tany Toliara izay samy nananan’Ambohitsorohitra kandida. Ankoatra ireo dia niaraha-nahita koa ny nitranga tamin’ny fifidianana izay ho filohan’ny fikambanan’ny zanak’i Toliara izay nanaovan’ny kandidan’Ambohitsorohitra amboletra. Efa nisy vata fandatsaham-bato, hoy izy kanefa dia natao tsangan-tanana ny fifidianana. Tetsy andanin’izay koa dia tsy tahotra tsy henatra ny filohan’ny CENIT izay tonga mandondom-baravarana any an-dapa. Zavatra tsy misy ary tsy fanao izany, hoy i Camille Mektoub izay nilaza fa mazava fa tsy hisy fifidianana ho vanona eto.

Raha ny tokony ho izy dia ny Komitin’ny fampihavanana na FFM no apetraka mialoha saingy noho ny kajikajy politika dia izy indray no napetraka farany. Samy tsy misy atokisana, hoy i Camille Mektoub na i Victor Manantsoa na Rasolondraibe Perry satria ity farany dia nametraka an’i Andry Rajoelina teny Mahamasina. Tsy hisy fampihavanana sy famotsoran-keloka marina eto fa izay tiany no omeny izany, hoy hatrany i Camille Mektoub.

Mirefarefa

Momba ny resaka fandriampahalemana indray, indrindra tamin’ny fankalazana fa tratra ny mpimasin-dRemenabila dia nambaran’i Mektoub fa afa-baraka ny tafika Malagasy ka dia namoronana fa nahatratra an’i Tokanono izy ireo. Talohan’io dia nisy minisitra nolazaina fa naka mpimasy hamono an-dRajoelina ary dia nilaza ho nanana porofo ho amin’izany ny Talen’ny DST (Direction de la sécurité du territoire) tamin’ny fotoanandro. “Ireny dia mampiseho amin’ny Malagasy fa tsy mino an’Andriamanitra ireo milaza azy ho mpitondra fa mody mitsidika fiangonana fotsiny”, hoy i Mektoub. Ankoatra izay dia nambarany fa aparitaka ny tsy filaminana hanamorana ny fanondranana an-tsokosoko, hanakotakonana ny trafika maloto. Mody atodika any Toliara ny mason’ny rehetra, hoy izy, kanefa mivoaka any Antsiranana sy Toamasina ny andramena ary eto an-drenivohitra kosa ny volamena. Fantatra, hoy i Camille Mektoub fa hilatsaka i Andry Rajoelina ka raha mbola izy no eo dia hosakanany amin’ny fomba rehetra ny fodian’i Marc Ravalomanana. Tsy ho an’ny filoha Ravalomanana ihany no hijoroana eto amin’ny kianjan’ny finoana, hoy ihany ity depioten’i Mananjary taloha ity fa ho an’ny firenena satria tadindomin-doza i Madagasikara.

Soa