Actualités

Partagé sur :
• facebook

Nanomboka ny alatsinainy teo ity resaka ity no nipoitra indray taorian’ilay ady teo amin’ny ministeran’ny fitantanam-bola sy ny tompon’ilay orinasa nanavao ity trano etsy Ampatsakana ity.

Araka ny didim-pitsarana mantsy rehefa tsy nahaloa ny volan’ity orinasa ity ny tompon’ny trano izay ny Rosianina dia any amin’ny orinasa nanavao ny trano no tokony handoavana ny hofan-trano mandrapahatonga ny vola lanin’izy ireo nanavaozana ny trano. Hatramin’ny volana aprily fotoana tokony handraisany izay hofan-trano izay ka hatramin’izao anefa dia tsy nandray izany ity orinasa ity na ny ariary aza. Tonga teny amin’ny Ministeran’ny Vola ny raharaha kanefa fandavana no setrin’izany. Nandeha ny fotoana ka henon’ireo tompon’ilay orinasa fa voaloa ihany ny hofan-trano saingy amin’olon-kafa. Nametraka fitoriana ny tompon’ilay orinasa nanamboatra ilay trano misy ny ministeran’ny Fifandraisana sy ny Hat. Ny alatsinainy teo no nosamborin’ny zandary eny Betongolo ny olona roa izay tomponandraikitra ao amin’ny orinasa iray mitantana ny fananan’ny Rosianina eto Madagasikara. Araka ny loharanom-baovao dia nanaiky ireo olona ireo fa nandray ilay vola 96 tapitrisa ariary ary lelavola no nandraisan’izy ireo izany.

Tamin’ny fanadihadiana ihany koa no nahalalana fa vola tao amin’ny tetibolan’ny Antenimierandoholona no nandoavana ireo vola ireo raha tokony ho ny fanjakana mivantana avy amin’ny alalan’ny Tahirim-bolampanjakana no hanaovana azy. Noho izany anton’izany dia natao famotorana eny Betongolo avokoa ireo tomponandraikitry ny vola eo anivon’ny Antenimierandoholona tamin’ity herinandro ity. Omaly moa no tokony ho natolotra ny fitsarana ity raharaha ity kanefa nahemotra amin’ny herinandro indray izany. 

Tia Tanindrazana

Samia mijoro ho an'i Gasikara.