Actualités

Partagé sur :
• facebook

Tsy nanaraka ny lalàna mifehy ny tolobaro-panjakana ny ankamaroan’ny fandaniam-bola teo anivon’ireo ministera 21 sy andrimpanjakana 3 izay mijoro amin’izao fotoana araka ny fanadihadiana notontosain’ny Commission Nationale des marchés na CNM nandritra ny efa-bolana voalohan’ity 2010 ity.

Ny 20-%n’ireo tolobarotra no nanaovany fitsirihana ary niainga tamin’ny valin’izany no nanomezany naoty ny ministera sy andrim-panjakana tsirairay avy araka ny fahadiovan’ny fanatanterahany ny tolobarony, ny fitovianjon’ny mpifaninana ary ny fahalalahan’ny fahazoana ny tolobarotra. Araka ny valin’ny fanadihadiana dia 8 monja ireo andrim-panjakana nahazo isa ambonin’ny 50/100 ka ny ministeran’ny fampianarana ambony no tsara naoty indrindra manana isa 75/100. Anisan’ny gisitra kosa, izany hoe ratsy naoty ny fiadidiana ny FAT, ny ministeran’ny tontolo iainana sy ny fifandraisana raha tsy voasokajy kosa ny ministeran’ny fanatanjahantena sy ny kolontsaina.

Raha ny fanazavan’Atoa Razaf Miarana, mpandrindra nasionalin’ny ARMP dia ny fiovaovan’ny tomponandraikitra misahana ny tolobaro-panjakana izay misolo isaky misy ministra vaovao no mahatonga io tsy fanarahan-dalàna io satria voatery mianatra asa hatrany izay tomponandraikitra eo. Ankoatra izay anefa dia namoaka ny tatitry ny zavatra hitany koa ny CNM ka notsikerainy ny tsy fisian’ny mangarahara momba ny fanomezana ny tolobidy sy ny tsy fahampian’ny vaovao momba ireo mpifaninana, ny havitsian’ireo mpifaninana ary ny fiverimberenan’ny anaran’ny mpifaninana efa mahazatra. Nomarihiny koa ny fividianana entana tsy misy “bon de commande” na koa fividianana entana tsy ialohavan’ny fampitahana ny vidiny. Andrasana amin’ny CNM amin’ny fanadihadiana tontosainy mandritra ny efa-bolana faharoan’ity taona ity ny marina momba ny fanamboarana ny kianjan’Antsonjombe sy ireo fotodrafitrasa hafa. Raha ny nambaran’ny filohan’ny FAT mantsy dia orinasa malagasy efatra no manatanteraka ny fanamboarana ny kianjan’Antsonjombe saingy tsy nahitana ny tolobidy momba izany tamin’ny gazety na koa teny amin’ny ministera isan-tsokajiny. 

Tia Tanindrazana

Samia mijoro ho an'i Gasikara.