Actualités

Toerana fiandrasana taksibe Lasa fialokalofan’ny tsy manan-kialofana sy ny adala

Actualités
Talata 10 Aprily 2018

Zary lasa fandrianan’ireo tsy manan-kialofana eto an-drenivohitra sy fipetrapetrahan’ny adala avokoa ny ankamaroan’ireo toerana fiandrasana taksibe eto an-drenivohitra tato ho ato na ny “abribus”.

Anisan’ny ahitana taratra izany ny etsy Anosy manoloana ny radio nasionaly Malagasy … Kivy vokatr’izany ireo mpiandry taksibe rehetra ka tsy vitsy ireo mihafy ny mijoro hatrany na dia efa reraka mafy sy lanin’ny masoandro aza raha misy koa ireo minia tsy mampiasa ireny fotodrafitrasa ireny mihitsy. Ankoatra izay dia maloto mila tsy ho azo diavin-tongotra ihany koa ny toerana misy ireny fiandrasana taksibe ireny. Eo ihany mantsy no manao maloto ny zanak’ireo tsy manan-kialofana raha eo ihany koa izy ireo no misakafo amin’ny hariva. Rehefa nanontaniana ny mikasika izany ny tompon’andraikitra eo anivon’ny kaominina Antananarivo Renivohitra dia nambarany fa efa misy sampandraharaha misahana manala ireny mpatory an-dalana ireny eo anivon’ny kaominina ary efa tsy mitsahatra ny manao izany asa izany io sampandraharaha iray io. Mikasika ireo adala indray dia nomarihin’ny tompon’andraikitra misahana izany ihany koa fa ny fanjakana no tena tompon’andraikitra amin’izy ireny satria tsy afaka mandray an-tanana ireo adala tsy misy mpanome sakafo ny eny Anjanamasina.

Pati