Actualités

Partagé sur :
• facebook

Tsy araka ny nanampoizana azy ny zava-mitranga eny amin’ny tobim-piantsonana vaovao Andohatapenaka ankehitriny. Ankoatra ny fidiran’ny mpanera sy ny fisian’ireo mpivarotra mandehandeha araka ny efa nitaterana azy teto amin’ny gazety Tia Tanindrazana dia efa manomboka maloto sy gaborakaka tanteraka ihany koa ny eny an-toerana amin’izao.

 Lasa  ataon’ireo mpivarotra hani-masaka toerana  fahandroan-kanina miaraka amin’ny kitay sy ny vilanibe ao ambadik’ireo tamboho kely karazana fefy mampiasaraka ity tobim-piantsonana ity amin’ny arabe. Eo ireo mpivarotra no mahandro ny hanina haroso ho an’ireo mpandeha  mandalo eny an-toerana izay marihina fa sady feno fotaka maloto no tsy misy fiarovana ihany koa.  Raha araka ny fanadihadiana natao tamin’ireo mpivarotra eny an-toerana dia  teo aloha ihany no somary masiaka ny tompon’andraikitra fa ankehitriny izy ireo tsy dia mivaky loha intsony. Tafiditra ao anatin’izany ny antokon-draharaha misahana ny fitaterana an-tanety izay nametrahana fitokisana manokana ny amin’ny fitantanana ity ivontoerana ity. Voafaoka ao koa ny minisiteran’ny fahasalamam-bahoaka izay tokony hanara-maso akaiky ny fivarotana hani-masaka amoron-dalana tahaka ireny ho fiarovana ny fahasalaman’ny mpanjifa. Ho an’ity farany manokana moa dia efa natombony tao amin’ny Boriborintany I ny fanofanana mpivarotra hani-masaka amoron-dalana   koa irariana  ny hahatongavany eny amin’ny tobim-piantsonana Andohatapenaka.

 Pati

Tia Tanindrazana

Samia mijoro ho an'i Gasikara.