Actualités

Partagé sur :
• facebook

Nanomboka ny alarobia teo no tonga tao Toamasina ny hery vonjy taitra avy amin’ny polisy na FIP Antanimora Antananarivo hanome tanana ny namany amin’ny fametrahana ny filaminana an-tanàn-dehibe.

Raikitra tokoa ny “opération”, ka tena andiany amin’ny fiara manokana tokoa ireo FIP Antananarivo sy ireo FIP Toamasina ary ireo polisy Toamasina no mirotsaka an-tsehatra. Eo indrindra anefa no mahabe resaka satria dia manjaka ny herisetra. Tsy ankanontany io fa dia midaroka izay sendra azy ary tsy mitsitsy fa izay mifanitsy ny lalany dia azy ireo avokoa, toa lasa herim-pamoretana indray. Misy amin’ireo voadaroka no tsy manaiky lembenana. Araka ny fantatra dia telo hatreto no sahy nijoro vavolombelona sy nitory. Raim-pianakaviana ny iray amin’izy ireo. Voadaroky ny polisin’ny FIP Antananarivo nanao fanaraha-maso amin’ny alina tao an-tokotaniny izy, raha sendra nivoaka fa naheno feo nigodogodona nanodidina azy.

Ny faharoa indray dia voan’ny totohondry sy tehamaina teo am-pilanonana anaty “cabaret” ara-dalàna satria nisy fanasana. Ny fahatelo kosa dia mpiasa hody alina avy niasa tsy nanontaniana kara-panondro akory fa avy hatrany dia daroka sy daka no nahazo azy. Ireo nitaraina ireo dia samy nampiseho ny taratasim-pitsaboany sy ny fitarainany avokoa. Ny fanontaniana mipetraka eo anivon’ny fiarahamonina ao Toamasina izao dia ny hoe “izao fidarohana olona izay sendra ireto FIP ireto ve no fametrahana izany filaminana ao Toamasina izany ?” sy ny hoe “Izao ve no iraka nampanaovina azy ireo, mba hanaovana hery famoretana ny olo-marina fa hampiriorio ny mpanao ratsy sy jiolahy mpitondra kalaky manana balan’ny zandary sy ny polisy mandrava mpandraharaha ?”.

Tia Tanindrazana

Samia mijoro ho an'i Gasikara.