Actualités

Toamasina Magazay sy tranombarotra maro voaroba

Actualités
Zoma 15 Oktobra 2010

Nivadika fandrobana fananan�olona ilay hetsika nataon�ny mpitondra posy nanehoany ny tsy fahafaliany, tamin�ny fanapahan-kevitra sy ny ambaran�izy ireo fa fanamparam-pahefana ataon�ny polisy monisipaly ao Toamasina.

Raha mbola nifanazava sy nifampiresaka ireo mpitokona tonga teo anoloan’ny Lapan’ny tanàna dia raikitra ny fandrobana tamin’ireo tsena goavana tao Toamasina. Voalohany ny tao Bazary be. Lasibatra ireo mpivarotra zava-maneno sy trano fisakafoanana silamo. Nopotehin’ireo mpandroba ny entana tsy zakany. Saika ripaka avokoa ireo mpivaro-damba sy mpivaro-bary tao Bazary kely. Samy nibata izay zakany ireo mpandroba. Ny tao Tanambao V koa dia tonga amin’ny fiteny hoe : “rava ny tsena” satria tena fandravana no nitranga fa tsy halatra sy fandrobana intsony.

Raha ny zava-nisy tao Toamasina ity aloha, dia midika fa leo ny vahoaka. Mila miala anaty krizy haingana ny firenena, fa mitotongana ny faripiainany. Raha nanontaniana mikasika ity sakoroka ity ny lehiben’ny faritra atsinanana Alain Mahavimbina dia nilaza fa “misy ny olana ara-tsosialy eto Toamasina, izay atahorana hivadika ho fifandirana ara-tsosialy ihany koa”. Tsy maintsy atao izay hamahana ny olana, hoy izy, ary tsy maintsy atao ny fanazavana ny tsy fitovian-kevitra eo amin’ny mpitondra sy ny vahoaka ary ezahina alamina ny tanàna fa mila filaminana koa ny mponina. Ho an’ny lehiben’ny distrika Toalina Razafindrabary kosa : “Marina fa sahirana ny vahoaka, afaka mitaky izay tiany hotakiana izy ireo fa ao anatin’ny fanajana ny lalana sy ny zon’ny hafa kosa”.

Fa/Rakoutou

ENCADRE

Olona 08 no voasabotry ny Emmo-Reg, ka ny 02 tratra teo ampangalarana mihintsy, fa ny 06 teo am-pitondrana ny zavatra avy nangalariny. Nisy nidaroka tao an-tranony tao Ankirihiry ny filohan’ny fikambanana ACT ho an’ny posy bisikileta.