Actualités

Soavimasoandro Tovolahy iray maty novonoin’ny adala

Actualités
Zoma 09 Martsa 2018

Tovolahy iray antsoina hoe Tiavina Angelo, izay vao 20 taona no maty vokatry ny tsindron’antsy nahazo azy teny Soavimasoandro omaly tokony ho tamin’ny 4 ora sy sasany tolakandro.

Lehilahy voalaza ho marary saina vokatry ny fidorohana zava-mahadomelina fantatra amin’ny solonan’arana hoe “Sopra” na “Soprano” no nahavanon-doza. Tsy miteny tsy mivolana fa ohatran’ny romotra hafahafa izany izy, ary raha vao nivoaka tamina toeram-pivarotana zava-pisotro iray ilay tovolahy, dia notsindroniny antsy, raha ny fitantaran’ny mponina iray. Teo amin’ny kibony an-kavia nifanandrify ny fony no nidiran’ilay antsy ary nampakarin’io mpanindrona io izany, ka nahahenjana ny ratra sy nahafaty azy. Nosamborina avy hatrany io nahavanon-doza io, ary nentina avy hatrany teny amin'ny polisy misahana ny ady heloka bevava na ny BC etsy Anosy. Ny olona kosa tetsy an-daniny efa somary tezitra mafy nanoloana ity zava-doza ity, saingy voasoroka ny fitsaram-bahoaka. Arovan’ny lalàna ireny olona adala ireny amin’ny toe-javatra na hadisoana nataony, raha voamarina tokoa ny tsy maha salama saina tsara azy, ka tsy hay izay mety ho tohin’ny raharaha.

Nangonin’i Toky R