Actualités

Partagé sur :
• facebook

Tsy niandry ela akory fa roa andro taorian’ny filazana fa hitokona ny mpikambana eo anivon’ny ACOA Famonjena Toamasina, dia raikitra izany ankehitriny.

Mirenty eo am-pidirana ny biraon’ity sehatra fampisamboram-bola madinika ity ny sorabaventy milaza izany.Raha nanontaniana ireo mpikambana dia ny tsy fahazoana ara-dalàna ny vola tahirin’izy ireo no anton’ity fitokonana sy fitakiana ataony ity. Teo aloha, hoy hatrany ireto mpikambana dia “nahazo vola ihany na kely tsy araka ny tahiry natao aza no azo fa ankehitriny tsy misy intsony izany na mitaky ny ahazoana izany izahay amin’izao ankatoky ny fidiran’ny mpianatra izao”. Ny mpitantana ny ACOA Famonjena kosa raha nilaza ny antony dia nanambara fa “tsy izy ireo akory no tsy te hanome ny vola tahirin’ny mpikambana tao aminy, fa ny vola mihitsy no tsy ampy am-pelatanana. Nisy mantsy ny famonjena ara-bola ireo Ombon-tahiry namana tamin’ny fahasahiranany, nefa taty aoriana sady tsy namerina ny vola nindraminy ireo namana ireo no mbola nisintaka tao anaty vondrona ihany koa, ka nahatonga ny saritaka ara-bola”.

Nambaran’izy ireo hatrany koa fa “misy ihany ny vola tahiry saingy voageja eny amin’ny banky noho ny disadisa misy eo aminay sy ny OTIV namanay teo aloha ihany, ka na ny vondrona tokony hamaha izany eo anivon’ny banky foibe sy ny ministeran’ny vola sy ny tetibola koa aza miady sy tsy mifankahazo, fa miasa loatra ny resa-bola eo am-pamahana ny raharaha ka mikatso tanteraka”. Tsara marihana anefa fa tao anatin’izay telo taona tena nivakian’ny ady teo amin’ny ACOA sy ny OTIV Littoral izay, dia efa mahatratra 25 ny antontan-taratasin’ady nifanolanana sy didy nivoaka sy navoakan’ny fitsarana mikasika ny raharaha. Fa ny tena mahasadaikatra dia mpitsara ny fitsarana ambaratonga voalohany ihany no misahana ny raharaha nefa samy hafa hatrany ny didy mivoaka sy ny mahazo ny fandresena. Tranga izay manasarotra ny famahana ny olana hatramin’izao.

Tia Tanindrazana

Samia mijoro ho an'i Gasikara.