Actualités

Partagé sur :
• facebook

Namoaka fanambarana omaly talata 2 novambra ny fikambanan’ireo mpampianatra mpikaroka manerana ny oniverstite 6 eto Madagasikara ary nilaza fa miato tanteraka ny fampianarana eny amin’ny oniveriste ary manohy ny fitokonana sy ny fitakiana izy ireo.

Takian’izy ireo amin’izany ny didy fampiharana ireo didim-panjakana telo efa neken’ny filankevitry ny ministra tamin’ny 6 oktobra 2009 mikasika ireo tombontsoa manokana ho an’ny mpampianatra mpikaroka dia ny didim-panjakana 2009/1214, 2009/1215 ary 2009/1216. Ankoatra izay dia mitaky ny fametraham-pialan’ny ministry ny fampianarana ambaratonga ambony, Atoa Tongavelo Athanase ihany koa ny SECES.  Ambaran’izy ireo moa fa tsy mahavita azy ary tsy manao afa tsy ny manendrikendrika sy manala baraka ny fianakaviamben’ny mpampianatra mpikaroka fotsiny ity ministra ity. Anisan’ny notakian’izy ireo ao anatin’ity fanambarana nivoaka omaly ity ihany koa ny hamoahana ny tetibola tokony hampiasain’ireo oniversite.

Manameloka tanteraka ny fananganana ilay filankevi-pirenena momba ny fanabeazana natsangan’ny ministera samirery ary tsy nakana akory ny hevitr’ireo voakasika rehetra amin’izany ny SECES. Toherin’ny fikambanan’ny mpampianatra mpikaroka ihany koa ny fampiharana maimaika ny sokajy L sy S amin’ny kilasy famaranana hiatrika ny fanadinanana baccalauréat amin’ny taona ho avy. Fehiny dia mikatso tanteraka izany ny Oniversite enina manerana ny nosy, ary tsy misy intsony izany aloha ny fanadinana. Milaza ny mbola ho vonona amin’ny fifampiresahana sy fifampiraharahana amin’ny fanjakana ihany anefa ny SECES.

Tia Tanindrazana

Samia mijoro ho an'i Gasikara.