Actualités

Partagé sur :
• facebook

Ny fanorana na fakana vola tsy ara-drariny ataon’ny mpitandro filaminana no voalaza fa niaingan’ny disadisa. Tamin’ity indray mitoraka ity anefa dia tsy ny polisy no voatondro fa ny zandary mandeha môtô indray.

Nitokona tsy nisy nety niasa ireo taxibe marobe mampitohy an’i Sab-nam sy Ambodivona ary naka sisin-dalana. Voalaza fa fiara telopolo no indray nahazo «contravention» noho ny tsy fanarahan-dalàna. Nolazain’ireo zandary avy etsy Fort-Duschène fa tsy manaraka ny bokin’andraikitra (cahier des charges) izy ireo. Anisan’izany ny fametrahana olona dimy isaky ny seza. Eo ihany koa ny amin’ny fandraisana vola mitsangana izay raran’ny lalàna mifehy ny fifamoivoizana hatrany. Raha ny filazan’ireo mpitatitra indray dia fanorana tsotra izao no nitranga. Nahoana no 30 isa no indray voasazy ? Amin’izay indray avy hatrany dia volabe no takian’ireo mpitandro ny filaminana, raha araka ny fanazavan’ireo. Niteraka fahasorenana ho an’ny mpandeha ity fitokonana omaly ity. Efa nanombotomboka tezitra ireo ny maraina, hany ka nitady vahaolana avy hatrany ny Ben’ny tanàna sy ny tomponandraiki-pahefana. Ny tolakandro ary dia fantatra fa naverina tamin’ireo taxibe tsirairay avy ny taratasin’ny fiaran’ireo izay nalaina.

Noheverina hilamina teo ny raharaha saingy toa efa tara loatra vao nanapa-kevitra ireo tomponandraikitra, hany ka tsy voafehy intsony ireo olona izay nametraka barazy tamin’ny alalan’ny kodiarana nodorana. Voatery niditra an-tsehatra amin’izay ny Emmo-Reg teo tamin’ny fanaparitahana ireo olona izay vory lanona sy tezitra. Naparitaka tamin’ny vovoka mampadatsa-dranomaso aloha izy ireo. Niverina ihany anefa rehefa kelikely ary mainka aza niharomotra ireo olona. Ny Emmo-Reg izay efa lasa no nantsoina niverina indray rehefa hita fa tsy ho voafehy intsony ireo olona. Raikitra ny tora-bato teo ary na ny fiaran’ny mpitandro ny filaminana aza dia voan’izany. Teo no nanomboka niraraka amin’izay ny baomba mandatsa-dranomaso. Raikitra ihany koa ny fifanenjehana tany anaty elakelan-trano rehetra tany.

Tia Tanindrazana

Samia mijoro ho an'i Gasikara.