Actualités

Partagé sur :
• facebook

Manao antso avo amin’ny tompon’andraikitra mba hijery akaiky ny momba azy ireo ny rezervista. Ny fandoavana ny «alignement» sy fampiakarana ny karama raisin’izy ireo mba hifanaraka amin’ny mari-karama na «point d’indice» moa no takian’ireto rezervista ireto.

Araka ny resaka nifanaovana tamin’ny solontenan’izy ireo omaly, dia tamin’ny taona 2008 no nampiakarina ho 1000 ity «point d’indice» ity, raha toa ka 620 izany teo aloha. Tsy niakatra nanaraka an’io anefa ny vola noraisina fa dia nijanona ho 90 000 ariary ihany ary mbola izay hatramin’izao 2010 izao. Tsy sanatria filam-baniny ny ataonay, fa tena fitakiana ny zonay madiodio, araka ny filazan’ny solontenan’ny rezervista tafaresaka taminay. Ny somary nahagaga ihany koa araka ny nambarany, dia nisy ny fanomezana vola, tafiditra ao anatin’ilay «alignement» tamin’ny herintaona, saingy ampahany tamin’ny rezervista ihany no nahazo. Mampaneno lakolosy izy ireo amin’izao fiandohana izao, mba handinihan’ny tompon’andraikitra izay tokony hatao, satria manamafy ny rezervista fa miasa ho an’ny tanindrazana izy ireo, nisy ny naratra sy nitondra takaitra, ary efa nisy mihitsy aza ireo namoy ny ainy. Raha manao be marenina ny tompon’andraikitra dia hihamafy koa ny fitakiana, araka ny filazan’ity solontenan’ny rezervista ity, saingy tsy nambarany mazava moa ny mety ho endrik’izany fitakiana izany. Mahatratra 6.000 eo ho eo ny rezervista manerana an’i Madagasikara amin’izao fotoana, raha araka ny fanisana farany. 

Tia Tanindrazana

Samia mijoro ho an'i Gasikara.