Actualités

Partagé sur :
• facebook

“Marary tsy mitaraina, very tanik’aody”. Io no nentin’ireo mitonona ho raiamandreny an-tanàna ao Toamasina nihaona tamin’ireo tomponandraikitry ny tetikasa Ambatovy notarihan-dRtoa Juanita Montalvio, hamahana sy tsy hisian’ny disadisa intsony eo anivon’ny tetikasa Ambatovy ao Toamasina Tanandava.

 Fihaonana natao ny alatsinainy teo tao amin’ny Lapan’ny faritra Atsinanana.Volan-kakafotra ny dinika, izay niompana mandrakariva tamin’ny filazana sy fitakiana fa “tokony ho maro an’isa eo anivon’ny orinasa mpisivana sy mpanodina nikela sy kobalta ao Tanandava Toamasina ny zanaky ny faritra izay antony mahatonga ny tsy filaminana eo anivon’ny tetikasa, satria ato anatin’ny faritra no misy ny orinasa”. Tsy nandà izany ny tetikasa Ambatovy araka ny lahatenin-dRtoa Juanita Montalvio. “Miankina amin’ny antontan-taratasin’ny mpiasa ihany no andraisana mpiasa na tsia, fa tsy resaka fihavanana na fiaviana akory. Mila olona ampy traikefa tsara ny orinasa amin’ny maha orinasa goavana ‘usine lourde’ azy, ka izay ‘compétant’ ihany no tena ilaina mandrindra ny fihodinany. Tsy midika izany fa ailika ny hafa. Izay no mahatonga ny tetikasa hanofana tanora mba ho tena matihanina amin’ny fikarakarana ny orinasa ary tafiditra ao anatin’izany ny tanoran’ny faritra”.

Nambaran-dRtoa Montalvio hatrany koa fa “efa natsangana ny komity manokana hisahana ny fisivanana ny fakana mpiasa. Ao anatiny ianareo raiamandreny an-tanàna, ka ho hita eo ny fandehany. Tsy maintsy izay tena ilaina no raisina fa tsy azo ekena kosa ny resa-pihavanana sy resa-piaviana eo am-pikirakirana ny antontan-tarasin’ny mpangatak’asa tonga”. Raha ny zava-misy teo amin’ny fihaonana nifanaovan’ny mitonona ho raiamandreny an-tanàna sy ny ekipan’ny tetikasa Ambatovy, dia azo ambara fa tara ihany satria ny fifanarahana teo amin’ny mpiasa sy ny mpampiasa efa vita sonia, vao nisy ilay fihaonana. Koa azo ambara fa mba mitady ny anjara toerany sy anjara fahefany eo anivon’ny tetikasa koa izy ireo tamin’ny fanomanana ity fihaonana ity, izay tsy nolavin’ny tetikasa noho ireo olana maro nosedrainy ka nampikatso efa ho tapa-bolana ny asa rehetra, ka mahataraiky amin’ny ankapobeny famaranana ny asa fanorenana.

Tia Tanindrazana

Samia mijoro ho an'i Gasikara.