Actualités

Raharaha Soalala Nankaiza marina ny 100 tapitrisa d�lara?

Actualités
Zoma 09 Jolay 2010

Mampanahy ny momba ilay vola 100 tapitrisa dôlara izay tokony harotsaky ny orinasa Wisco ho an’ny fanjakana Malagasy. Ny talata 06 jolay ny ministry ny vola sy ny tetibola, Hery Rajaonarimampianina, dia nilaza teo anoloan’ny mpanao gazety fa efa voarain’ny fanjakana io vola izay hahafahan’ny Wisco mandray amin’izay ny tany hotrandrahana ao Soalala. “Efa talohan’ny fetim-pirenena aza izany no voarotsaka tao anatin’ny kaotim-bolan’ny fanjakana” raha araka ny fanamarihan’io tompon’andraiki-panjakana io. Ny mahagaga anefa, raha araka ny loharanom-baovao eo anivon’ny Banky foibe, dia tsy mbola nisy izany vola izany napetraka ao. Na ny taratasy manamarina izany aza (notification) dia tsy tonga teo anivon’ny Banky foibe, raha araka ny fanazavan’ny loharanom-baovao maromaro. Aiza ary ny tena misy io vola io amin’izao fotoana ? Mila fanazavana bebe kokoa avy amin’ny Fitondrana mba hisian’ny fangaraharahana satria anisan’ny andrandrain’ny Malagasy izay tena efa latsaka an-katerena tokoa io vola io. Ny momba ny hazo sarobidy izay haondrana etsy sy eroa nefa toa tsy hita marina izay tena tompon’andraikitra voasambotra, ny fanondranana cacao izay toa olom-bitsy ihany no migoka ny maminy, ny fanondrotana sy ny fampidinana ny solika kanefa toa tsy misy antony mazava sns, dia toa manome endrika fa samy manao izay danin’ny kibony sy izay saim-patany ny tsirairay. Mila fanazavana sy porofo bebe kokoa ny vahoaka satria harem-pirenena io…

r.d