Actualités

Raharaha Free news Feno tsy fanarahan-dalàna, hoy ny mpisolovava

Actualités
Zoma 23 Jona 2017

Nalain’ny avy eo anivon’ny biraon’ny polisy misahana ny heloka bevava am-bavany etsy Anosy omaly maraina ny talen’ny famoahan’ny gazety Free news, Haja Rasoanarivo sy ny tonian-dahatsoratr’izy ireo, Toky Ravaroson.

Ny filohan’ny antenimierandoholona, Honoré Rakotomanana no nametraka ny fitoriana ny gazety noho ilay resaka fanamboarana tranobe etsy Ambatomirahavavy. Betsaka ny tsy fanarahan-dalàna nitranga omaly, hoy ny mpisolovava ny gazety. Ny mahazatra dia ny eo anivon’ny Sécurité Urbaine de Tananarive ( SUT) na ny polisy etsy amin’ny faritany no manao fanadihadiana fa tsy ny polisy misahana ny heloka bevava. Voalaza mazava ao amin’ny andininy faha-32 ao anatin’ny lalàna mifehy ny serasera koa fa ny talen’ny famoahana ihany no tokony ho nampanantsoina. Rehefa tsy eo ilay voalohany vao hantsoina ny tonian-dahatsoratra. Ny talen’ny famoahana ihany koa no tokony ho niditra aloha. Araka ny fampitam-baovao hatrany moa dia anio no hahazo fampiantsoana koa ny tompon’andraikitra voalohan’ny gazety, ary tsy mifanaraka amin’ny lalàna hatrany izany, hoy ity mpisolovava ity.

Mirija