Actualités

Raharaha Fort Duchesne Nangina tsy nandrenesam-peo ny Prefen�Antananarivo

Actualités
Alarobia 26 Mey 2010

Mbola misarika ny sain�ny maro ny raharaha FIGN izay nahafatesana miaramila sy sivily sy mpitondra fivavahana.

Ny nanaitra ny maro dia tsy nandrenesam-peo momba iny raharaha teny Fort Duchesne iny i Andry Rajoelina, nangina ihany koa ny Prefen’Antananarivo. Betsaka no manontany hoe, inona no ataon’ny fitsarana manoloana ny raharaha 20 mey teny Fort Duchesne ? Nisy ny voafonja, naratra ary maty nandritra ny fitifirana teny. Tsy vitsy no nampitaha iny raharaha iny tamin’izay nitranga ny 7 febroary 2009, izay mitovy tsy misy valaka satria samy fiarovana ny andrim-panjakana no natao. Tamin’ny 7 febroary 2009, dia notondroin’ny mpanao politika ho mpanongam-panjakana ny TGV tarihin’i Andry Rajoelina sy Monja Roindefo. Tamin’ny 20 mey 2010 dia mpitondra fivavahana sy ny FIGN no notondroina ho mpanongam-panjakana. Raha ny toerana indray, Ambohitsorohitra izay lapam-panjakana voafefy ho an’ny 7 febroary 2009 ; tany malalaka teny Mausolée Avaratr’Ambohitsaina kosa ny 20 mey 2010. Raha ny mpitandro filaminana indray dia Garde présidentielle sy ny Emmo-Nat no resaka tamin’ny 7 febroary 2009 raha ny FIS sy ny Emmo-Reg mitambatra kosa no niseho ny 20 mey 2010. Ny zava-nisy : an-daniny, nirohotra haka ny lapam-panjakan’Ambohitsorohitra ny olona avy eny amin’ny Kianjan’ny 13 mey. An-kilany, nivory nanao fotoam-pivavahana eo amin’ny toerana malalaka ny olona teny Mausolée.

Tsy hita ny Prefen’Antananarivo na dia efa nantsoina aza ny marainan’ny sabotsy 07 febroary 2009, nangina tsy nandrenesam-peo kosa ny Prefen’Antananarivo ankehitriny ny 20 mey 2010. Nisy sakana miisa 3 nataon’ny Emmo-Nat teo amin’ny Hotel du Louvre, Banky Foiben’i Madagasikara ary teny amin’ny Paositra Antaninarenina tamin’ny taon-dasa. Nalalaka tsy nisy sakana kosa tamin’ny alakamisy 20 mey. Nisy ny fampitandremana sy ny fifampidinihana ny 7 febroary 2009 ; ny mifanohitra amin’izay kosa no tsikaritry ny olona teny Fort Duchesne. Voafaritra ny toerana tsy azo aleha satria faritra mena teny Antaninarenina. Toerana tsy voarara ary niantsoan’ny mpitandro filaminana ny vahoaka hivavaka kosa no teny Mausolée. Antaninarenina : namaky barazy ny olona ary nibosesika hiditra tao amin’ny faritra voarara. Mausolée : tsy nihetsika teo amin’ny toerany ny olona nanohy ny vavaka. Rehefa izay dia niaro ny lapa ny mpiambina teo Ambohitsorohitra ny 07 febroary 2009. Tsy nisy toerana narovana fa nitifitra sy nanampatra ny heriny ny Emmo-Reg sy ny FIS teny Avaratr’Ambohitsaina. Nisy fifamaliana tifitra avy tamin’ireo vahoaka nirohotra sy ny mpiambina ny lapa teny Ambohitsorohitra ; tsy nisy valaka tamin’izany saingy nisy fifamaliana tifitra teo amin’ny samy mpitandro filaminana teny Mausolée.

Mahametimety ny sasany

Ireo voalaza ho tompon’andraikitra dia voatonona ny anaran’i Marc Ravalomanana ny 07 febroary. Filoham-pirenena voafidim-bahoaka izy ary teo am-perinasa tamin’iny fotoana iny. Namoahana “mandat d’arrêt international” ankehitriny. An-kilany kosa i Andry Rajoelina, Filohan’ny HAT, tsy mbola nandraisana fepetra. Ny manamboninahitry ny tafika sy ny polisy henjehina sy gadraina taorian’iny raharaha 07 febroary iny. Ny kolonely Ravalomanana Richard sy Lietna kolonely Lylison kosa nomena sitraka sy dera tamin’ny raharaha 20 mey 2010 teny Mausolée. Araka ny voalazan’ny fitsarana dia miisa 19 ireo tompon’andraikitra tamin’ny raharaha 07 febroary ary hotsaraina ny 23 jona 2010 ; araka ny voalazan’ny kolonely Ravalomanana Richard dia 600 no isan’ny tompon’andraikitra (miaramilany) teny Fort Duchesne.

Vokany, na tamin’ny 07 febroary 2009 na ny 20 mey 2010 dia nisy ny maty ary nisy ny naratra. Natao hazalambo, nogadraina ary hohelohina eo anatrehan’ny fitsarana ny sasantsasany tamin’ireo “Garde présidentielle” ; nomena mariboninahitra kosa ireo miaramila sasantsasany. Mahazo rariny ary afaka mivezivezy malalaka sy tsy matahotra ny hohadinina akory ireo mpitarika sy mpampirisika ny vahoaka handroba ny lapam-panjakana tamin’ny 07 febroary 2009, raha toa ka samborina ireo mpitarika sy mpiaro ny vahoaka ary gadraina sy hohelohina ho mpanakorontana ny nandray anjara tamin’ny 20 mey 2010.

Na tamin’ny 7 febroary 2009 na tamin’ny 20 mey 2010 dia samy nihevitra fa nanao ny asany avokoa ireo mpitandro ny filaminana voalaza ery ambony. Samy niaro ny andrim-panjakana tandrify azy manoloana ireo heverina ho mpanongam-panjakana. Mitovy ny vokatra azo : nisy ny maty, nisy ny naratra. Ny fanontaniana mipetraka eto anefa dia ny hoe : mitovy tahaka izay koa ve ny fampiharana ny lalàna eto Madagasikara ? Raha ara-dalàna ny tamin’ny 7 febroary 2009, nahoana no henjehina ireo mpitandro ny filaminana tamin’izany ? Raha tsy ara-dalàna kosa, nahoana no tsy tokony hosaziana ireo mpitandro ny filaminana tamin’ny 20 mey 2010 ? Sao dia sanatria efa nitongilana ny mizàna ka ny lalàna velona no hitsakitsahina sy avilivily araka izay mampametimety ny sasany ?

Nangonin’i Jean D.