Actualités

Partagé sur :
• facebook

Niisa 33 ireo olona nosamborin’ny Hery vonjitaitran’ny polisy (FIP) nisambotra ireo olona heverin’izy ireo fa tompon’antoka tamin’ny fitsaram-bahoaka ka nahafaty Polisy roalahy tany Ambalamanga,

 kaominina Antsakabary, distrika Befandriana Avaratra ny 18 febroary 2017. Nentin’izy ireo ao Antsohihy izy ireo, natao famotorana. Navotsotra alohan’ny fotoana anio hanolorana ireo voampanga amin’ny Fampanoavana anefa ny Ben’ny tanànan’Antsakabary Franck Lemont, sy ny lefiny, isan’ireo nosamborina. Nisalotra samboady, nitsena ny iraky ny governemanta nahitana ny minisitry ny fanajariana ny tany sy ny fampitaovana, Rafidimanana Narson , ny minisitry ny fiarovam-pirenena jeneraly Rasolofonirina Béni Xavier ary ny Sekreteram-panjakana miadidy ny zandary, jeneraly Paza Didier, teny amin’ny seranam-piaramanidin’Antsohihy omaly nitondra fanampiana ho an’ireo traboina vokatry ny doro trano nataon’ny Polisy tamin’ireo tanàna miisa enina tany Antsakabary nandritra ny fisamborana olona notanterahin’izy ireo ny alarobia teo, ka nahafaty vaviantitra iray jamba tao Ambinanindrano. Nandritra izany no nitantaran’ny Ben’ny tanàna ny zava-nitranga marina tany amin’ny tanàna feheziny sy ny fampijaliana nihatra taminy nataon’ireo Polisy. Miisa 31 ireo olona no hiakatra Fitsarana amin’ity alatsinainy 27 febroary ity, ka vehivavy ny roa amin’ireo ary mpampianatra ny dimy. Omaly alahady hariva, taorian’ny fahatongavan’ireto iraky ny governemanta ireto tao Antsohihy, ireo voarohirohy vao azon’ny fianakaviana nanateran-kanina.

Jean D.

Tia Tanindrazana

Samia mijoro ho an'i Gasikara.