Actualités

Partagé sur :
• facebook

Nampiaka-peo ireo solombavambahoaka teny Tsimbazaza, indrindra ireo avy any amin’ny Faritra Atsimo manoloana ny trangan-javatra niseho tany amin’ny distrikan’Ankazoabo Atsimo any Toliara izay nahalavoan’ny dahalo mpitandro ny filaminana 8 tamin’ny tifitra variraraka.

Rakotomalala Lucien (Morombe)

« Efa nampitainay teto amin’ny Antenimieram-pirenena fa tsy hijanona io resaka io raha tsy hampiharin’ny fanjakana ny fananganana ny « Unité Spéciale Permanante Anti-dahalo » fa tsy io « Opération » io foana no atao any Atsimo any. Hilaina koa ny fampitaovana an’io « Unité » io toy ny fanomezana Helikoptera, Gillet anti-balles, basy mahery vaika … fa tsy io fandehanana an-tongotra manaraka aorian’ny daholo io mihitsy no vahaolana. 10 mantsy ny dahalo hitanao mandroaka ireo omby nangalariny fa rehefa manaraka any aloha any ianao dia mipoitra ny 50 hafa farafahakeliny dia ireny manao fahirano ireny. Tena alefan’ny fanjakana any amin’ny labatoara tsotra izao ireo miaramila sy zandary alefa mampandry tany ireo raha ny marina”.

Randrianandraina Théophile Christian (Benenitra)

“Manamafy izay voalazan’ny depiote Lucien teo izay ny tenako. Izahay dia efa nampiaka-peo teto Tsimbazaza fa tokony hofoanana ireo Labatora famonoana omby natsangan’ny Sinoa any Toliara sy etsy Vontovorona ireo fa ireo no mahatonga ny firogatry ny halatra omby any Atsimo any. Tena omby halatra ireo hanin’Antananarivo isan’andro ireo  fa isan’andro vaky izao dia fiarabe tsy latsaky ny 30 no indray miainga ho aty an-drenivohitra aty. Ambarako etoana fa tsy hisy mihitsy mpiompy avy any Atsimo hivarotra omby 20 indray mandeha aminao izany. Mihanaka ny basy mivezivezy etsy sy eroa any an-toerana. Mbola takianay ny hampidirana miaramila raikitra ireo zazavao nahavita fanompoam-pirenena fa  ireny no lasa sahisahy mampiasa ny fahaizana nifitra tao amin’ny miaramila. Ao anatin’ny PGE navoakan’ny fanjakana dia voalaza fa migadra hatrany amin’ny 10 taona izay tratra  mangalatra andramena fa tsy mba voatonona ny amin’ny mpangalatra omby. Soso-kevitra homenay ny hoe : raha mbola any Toliara any no hanagadrana ireo mpangalatra omby ireo dia tsy hahafay an-dry zareo izany fa alefa higadra an-tany lavitra toy ny eny Tsiafahy avy hatrany izy ireo na alefa sesitany tahaka ny tany Nosilava taloha.  Amiko, tena henatra ho an’ny fanjakana izany hoe mpitandro ny filaminana viravirain’ny dahalo izany”. 

Nangonin’i Ntsoavina Evariste

Tia Tanindrazana

Samia mijoro ho an'i Gasikara.