Actualités

Radio sy Tele Varatraza Mandrahona tsy hanao ampitampitao sy vaovaom-paritra

Actualités
Talata 04 Mey 2010

Tao anatin’ny savorovoro no nentin’ny mpiasan’ny Radio sy Tele Varatraza, radio sy telem-paritra ao Antsiranana nanamarika ny “03 mey”, andro iraisam-pirenena ny fahalalahan’ny asa fanaovan-gazety. Marisarisa ny fifandraisan’ny mpiasa, izay mpampahalala vaovao ny ankamaroany, sy ny mpitantana ary tonga hatrany amin’ny fifampiangana amin’ny lafiny fitantanana ny resaka. Mifanao ankolafy ny mpiasa vokatr’izany. Nisy ampahany amin’izy ireo re fa nandefa taratasy any amin’ny minisitry ny serasera ao amin’ny governemantan’ny FAT, Nathalie Rabe ny 29 aprily 2010 mitaky ny tokony handraisana fepetra manoloana ity disadisa ity. Lasa lavitra ny resaka ankehitriny satria re fa nanapa-kevitra ireto mpiasa ireto fa tsy handray ary tsy hanatanteraka baiko avy amin’ny Tale izy ireo. Mandrahona ny tsy hanao ampitampitao sy vaovaom-paritra ary ny vaovao amin’ny radio sy fahitalavitra ao an-toerana ihany koa ny mpiasa manomboka amin’ity talata 4 mey ity raha tsy misy fanapahan-kevitra raisin’ny minisitera manoloana ity disadisa mampihisatra ny asa ity. Milaza ny tsy hijanona eo ireto mpiasa ireto raha tsy misy fanapahan-kevitra indray ny alarobia 5 mey, hiova endrika hafa ny fitakina ary hiha mafimafy kokoa, araka io taratasy nalefa io, izay feno sonia marobe.

Nangonin’i Jean D.