Actualités

Partagé sur :
• facebook

Tsy misy tsy mikaikaika noho ny krizy lavareny nanomboka tamin’ny taona 2009 ny rehetra.

 Tena mizaka ny tsy eran’ny aina tao anatin’izay efa-taona izay, raha eo amin’ny sehatra ara-toekarena, ireo orinasa madinika mpanao taozava-baventy sy taotrano fantatra amin’ny hoe PME –BTP. Iaraha-mahalala fa tsy misy intsony ny fanamboaran-dalana sy fotodrafitrasa lehibe afa-tsy vitsy dia vitsy sisa ary raha misy aza dia azon’ny orinasa goavana avy hatrany izy ireny.

Raha efa tsy nisy afa tsy ny 10%-n’ny tsenam-baro-panjakana no mba notsinjarain’ireo orinasa madinika sy salantsalany maherin’ny 3000 talohan’ny taona 2009 dia manakaiky ny 0% izany ankehitriny, hoy Rasoloarisoa Henri Victor, filohan’ny kaonfederasion’ny PME –BTP. “Mitanin’andro sy orana sisa ireo fitaovana rehefa tsy miasa. Nanampy koa ny Sekretera jeneralin’ity kaonfederasiona ity fa nandroaka ny mpiasany ny ankamaroan’ireo orinasa izay nikatona koa ny 70% araka ny tatitra voaray avy any amin’ny faritra. Tsy mbola nisy mihitsy anefa fepetra manokana noraisin’ny fanjakana hanomezana tosika azy ireo tato anatin’izao tetezamita.

Manararaotra ny fisian’ny tolotanana ataon’ny FAT amin’ireo mpitatitra ry zareo ka miantso mba hijerena ny momba azy koa. Efa manana sosokevitra momba izay filany rahateo ireto farany. Voalohany dia ny fitsinjarana miaraka amin’ny fanjakana ny TVA alaina amin’ny akora toy ny vatokely, fasika ary biriky. “Tsy afaka hampandoa TVA amin’ny mpanjifa an’ireo akora ireo izahay nefa akan’ny fanjakana TVA ka tokony ho any amin’ny mpamatsy ny entana mihitsy dia efa alaina ilay izy ary jerena izay anjara tokony haloan’ny fanjakana amin’izany fa tsy zakanay samirery”, hoy hoy Rasoloarisoa Henri Victor nanazava. Angatahan’ireto mpandraharaha madinika amin’ny sehatry ny taozava-baventy sy taotrano ireto koa ny fanalefahana ny fepetra takian’ny fanjakana sy ny mpamatsy vola amin’ny fanomezana tsena. “Tsy voatery homena orinasa goavana foana ny asa fa mba tsinjaraina amin’ny orinasa madinika 4 na 5 raha toa ka asa maivamaivana ilay izy”, raha nanome ohatra momba io Rasoloarisoa Henri Victor.

Tia Tanindrazana

Samia mijoro ho an'i Gasikara.