Actualités

Mpivarotra amoron-dalana eny Andravoahangy Nentanina hiditra ao anaty tsena

Actualités
Zoma 09 Febroary 2018

Nidina ifotony tetsy amin’ny Tsenan’Andravoahangy ny delegen’ny Boriborintany fahatelo Andriamamonjisoa Rado sy ireo ekipany ary ny lehiben’ny tsena omaly 08 febroary 2018 maraina nanentana ireo mpivarotra amoron-dalana hiditra amin’ny ara-dalana ao anatin’ny tsena, satria efa misy toerana malalaka voatokana ho azy ireo ao.

Miisa 200 latsaka ny toerana mbola malalaka eny amin’ny « étale » izay ho an’ny mpivarotra legioma. Namboarina ihany koa ny « pavé » na lalana miditra mankao an-tsena, ka tsy tokony hisy olana intsony. Efa nisy ny naoty izay nomena azy ireo, ny tokony hialany eny amoron-dalana fa tsy maintsy miditra ao anatin’ny tsena avokoa efa ho 2 herinandro izay, hoy ny lehiben’ny tsena. Hitohy anio ny fandaminana ary hihatra amin’izay ny sazy ho an’izay mbola minia mivarotra eny amoron-dalana. Marihana ihany koa, hoy ny lehiben’ny tsena, fa ny mpivarotra tantsaha dia mivarotra manomboka amin’ny 3ora maraina ka hatramin’ny 8 ora maraina ihany.

Toky R