Actualités

Mpitondra fanjakana Manapotika ny fanabeazana eto Madagasikara

Actualités
Talata 25 Aogositra 2015

Tsy iadian-kevitra fa maro tokoa ireo zaza miditra an-tsekoly saingy betsaka torak’izay ihany koa ireo ankizy mandao lakilasy tsy nahatojo hatramin’ny farany. Antony mahatonga io tranga io ny tsy fifehezan’ny minisitera mpiahy mantsy ny hevitry ny «fanabeazana», hoy ny mpitantana ny foibe nasionalin’ny «Association des Institutions Laïques pour l’Education» Rakotomalala Célin. Lesoka fototra ny lafiny kalitaon’ny fanabeazana amin’ny ankapobeny toy ny fotodrafitrasa miaraka amin’ireo kojakoja maro isan-karazany takian’ny sekoly. Tsy vitan’ny minisiteran’ny Fanabeazam-pirenena akory na dia ny nandà ny fanatanterahana ny fifidianana tao anatin’ny vanim-potoanan’ny fanadinam-panjakana farany teo aza, hoy ity filohan’ny fikambanana «Aile» ity. Tsy matihanina intsony ireo mpanabe satria ilay hasin’ny asa fanabeazana mihitsy no very tanteraka. Mifantoka fotsiny amin’ny fampiofanana ahazoana diplaoma ny fampianarana eto Madagasikara. Voabaikon’ny vola avokoa mantsy ankehitriny na ny fanjakana na ireo mpampianatra natao hampita fahaizana sy fahalalana. Mpitondra tsy manan-janaka no tsy mitsinjo taranaka manapotika ny tontolon’ny fanabeazana ny fitondram-panjakana Malagasy, araka ny fanamarihan’ity tompon’andraikitra mpanabe ity.

Ramano F.