Actualités

Partagé sur :
• facebook

Notanterahina omaly alarobia 26 jolay 2017 teny amin’ny CCI Ivato ny lanonam-pamoahana tamin’ny fomba ofisialy ireo mpiraki-draharahan’ny Fitsarana andiany faha-17,

niofana tao amin’ny Sekolim-pirenena Mpanofana Mpitsara sy Mpirakidraharaha (ENMG). Miisa 98 ireo, ka « Ny Avo » no anarana nosafidiany nampisalorana ity andiany ity. Nanome voninahitra sy nitarika ny lanonana ny praiminisitra lehiben’ny governemanta Mahafaly Solonandrasana Olivier sady ray mpiahy ity andiany ity. Tamin’ny lahateny nataon’ny praiminisitra no nitodihany tamin’ireto mpiraki-draharaha vao nahazo maripahaizana fa tokony handray anjara amin’ny fametrahana ny Fitsarana tsy mitanila sy ny tany tan-dalàna izy ireo. « Misy ny tamberin’andraikitra amin’ny maha mpiasam-panjakana. Aza hadinoina ny antom-pisiantsika amin’ny maha mpiasam-panjakana antsika dia ny fikatsahana ny tombontsoa ambonin’ny firenena. Ilaina ny fitakiana ny tombontsoa ary rariny izany fa aza adino ny tombontsoa ambonin’ny firenena », hoy izy. Tokony ho tsaroana fa mpiasam-panjakana ianareo nefa mpiasam-bahoaka ihany koa. Jereo ny olona rehetra fa aza asiana fanavahana. Manompo vahoaka amin’ny sehatra tsirairay no asanareo, hoy hatrany ny Lehiben’ny governemanta. Anisan’ny tonga nanotrona ny lanonana ny filohan’ny Antenimieran-doholona, ny Minisitry ny Fitsarana, ny Filoha lefitry ny Antenimierampirenena, ny Tale jeneralin’ny sekoly, ny Lehiben’ny firaiketan-draharaha eto Antananarivo no sady reny mpiahy ny andiany “Ny Avo”.

Toky R

Tia Tanindrazana

Samia mijoro ho an'i Gasikara.