Actualités

Partagé sur :
• facebook

Nikatso tanteraka ny teny Ivato omaly tontolo. Tsy nisy ny fiaramanidin’ny kaompaniam-pitaterana Air Madagascar nandray fiaingana, araka ny vaovao voaray avy ao amin’ny foiben’ny fandrindrana ara-teknika eny an-toerana.

Nisavoritaka

Tokony ho 12 no isan’ny  sidina  natao omaly  kanefa dia tsy nisy  niainga avokoa,  anisan’izany  ny  nankany Sina izay tokony ho niainga  tamin’ny  5 ora  katroka. Ny  sidina  mankany Toliara moa dia in-telo no  nanaovana vinavinan-jotra  omaly tontolo andro  fa tsy nisy tanteraka avokoa. Teo  amin’ny faharoa saika hiaingan’ny sidina dia nilamina indray ny  taty Antananarivo fa ny tany Toliara  no tsy nety nandray ny fiaramanidina dia voatery nijanona. Saika halefa ihany koa ny sidina mampitohy an’Antsiranana sy Morondava saingy tamin’ny ora farany dia tsy tontosa. Raha bangoina  tokana izany dia narahin’ny mpiasan’ny Air Madagascar 100% ny fiantsoana fitokonana nataon’ny  mpitarika sendikaly. Mpiasa 4 izay mitarika ny fitokonana no nahazo taratasy fandroahana omaly, niaro tena izy ireo ary nilaza fa tsy rariny sady tsy ara-dalàna izany.Ankilan’izay anefa manizingizina ny tale jeneralin’ny Air Madagascar Atoa Haja Raelison fa tsy ara-dalàna io fitokonana ataon’ny mpiasan’ny Air Madagascar io ary efa namoaka taratasy milaza izany mihitsy omaly ny ministeran’ny asam-panjakana sy ny asa.

Fatiantoka goavana

Fatiantoka   iray lavaka noho izany no mbola mahazo ny  Air Madagasikara izay  voatery  mamerina ny volan’ireo mpandeha tsy latsaky ny 5 miliara ariary isan’andro no fatiantoky ny orinasa vokatr’izao  fitokonana izao. Tsiahivina hatrany fa ny  fitakiana ny fialan’ny minisitry ny Fitaterana, ny filohan’ny filankevi-pitantanan’ny  orinasa, ny  tale jeneralin’ny Air Madagascar sy ny ACM  no  mahatonga izao fitokonan’ny  orinasa Air Madagascar izao. Ho an’ity taona ity dia potika tanteraka ny  fandaharan’asa  mikasika ny fizahantany  izay nezahina  hampidirana  mpizahatany 300.000 izay sinoa no ankabetsahany. Tsy lazaina intsony ny famoanana ny  zotra  mihazo an’i Ste Marie  izay handray ny « festival des baleines »izay  efa nidiran’ilay  mpanolotra fandaharana frantsay malaza Julien Lepers an-tsehatra.

Andry Ratovo           

Tia Tanindrazana

Samia mijoro ho an'i Gasikara.