Actualités

Mahazoarivo Niandry vasoka ny SMM

Actualités
Talata 05 Oktobra 2010

Araka ny efa nambarany dia tsy nihemotra manoloana ny ramatahora nataon’ny FAT tamin’ny alalan’ny ministry ny fitsarana ireo mpitsara mivondrona ao amin’ny SMM eto an-drenivohitra fa nanatontosa ny fitokonany nanoloana ny biraon’ny Fitsarana tampony Anosy omaly 04 oktobra. Nisy anefa ny fampiantsoana ny biraon’ny Sendika hifampidinika amin’ny Praiministra ary nisy tokoa ny solontena nankeny Mahazoarivo izay notarihin’ny filohany Arnaud August Marius. Nasaina niandry vasoka anefa ireo delegasiona satria tsy voaray teny Mahazoarivo mihitsy izy ireo. Raha ny vaovao azo dia nihaona tamin’ireo solontenan’ny SADC izay mamita iraka eto amintsika amin’izao fotoana ny praiministry ny FAT. Nanao tatitra tamin’ireo namany ny filohan’ny SMM rehefa niverina teny Anosy ka nanambara fa aorian’ny filankevitry ny governemanta vao hampiantso ny SMM ny praiministra. Nohamafisiny koa fa vonona amin’ny fifampidinihana hatrany ny mpitsara saingy tsy manakana ny fitokonana izay hitohy hatramin’ny alakamisy izany.

Yves