Actualités

Lozam-pifamoivoizana teny Analakely Mpanolotsain�ny FAT nigadra

Actualités
Alatsinainy 21 Jona 2010

Sendra ny taolana koa ity mpanolotsain’ny Fat iray ity ka any am-ponja no niafarany. Raha tsiahivina dia nisy lozam-piarakodia teny Analakely, tapa-bolana lasa izay. Fiara Golf an’ity mpanolotsaina ity no nandona fiara iray hafa izay manamboninahitra jeneraly no tompony. Ilay nandona indray anefa no avo vava avy eo satria mpanolotsain’ny Fat, hono.

Niezaka niantso tetsy sy teroa mba hiaro azy kanefa tsy nandaitra izany fa ny sabotsy teo no natolotra ny Fampanoavana ihany ny raharaha. Mamo moa ilay mpanolotsaina tamin’io ka tsy nisalasala ny tao amin’ny Fampanoavana nampiditra azy avy hatrany any am-ponja.

Tsy vitan’ny avo vava moa ity mpanolotsaina ity araka ny fantatra tamin’io fa mbola nataony tsinontsinona ihany koa ireo zandary tonga teny an-toerana tamin’ny fotoana nisian’ny loza, izay anisan’ny antony nahatezitra mafy ny tao amin’ny Fitsarana. Ny 28 jona izao no fantatra fa hitsarana ity raharaha ity. Mandra-piandry izay aloha dia any am-ponja ingahy mpanolotsaina.