Actualités

Partagé sur :
• facebook

Nolanian’ireo tompon’andraikitra eo anivon’ny ministeran’ny fahasalamana sy ireo lehiben’ireo tobim-pahasalamana lehibe rehetra eto amin’ny firenena nandritra ny fivoriany tetsy Anosy ny lalàna mifehy ny sata sy ny fandaminana ny asan’ny hopitaly malagasy.

Rijan-teny tsotra mantsy hatramin’izay no nifehy ireo tobim-pahasalamana ka samy nampihatra izany araka izay fahazoany sy fandraisany azy avokoa ireo tompon’andraikitra nifandimby nitantana ireny toeram-pitsaboana ireny. Raha ny tatitra azo dia nisy tamin’ireo lehiben’ny hopitaly sasany no nanararaotra ny toerany ka nanao fandaniana nihoa-pampana. Ny taona 2004 vao nisy tsikelikely ny tetikasa fanovan-drafitra teo anivon’ny hopitaly na dia tsy mbola feno aza ny fepetra maha ara-dalàna izany. Anisan’ny fanovana nanomboka nihatra kosa anefa ny fisian’ny filankevi-pitantanana teny anivon’ny Hopitaly CHU sasantsasany, ny fanankinana amin’ny sehatra tsy miankina ny sakafo sy fivarotam-panafody eo anivon’ny hopitaly ary ny fampandoavana sarany ny marary. Ankoatra izay dia misy koa ireo fanovana natao tamin’ny alalan’ireo rijan-teny toy ny fametrahana ho CHD2 ny CHD1 ; ny fanatsarana ny fitaovana teny amin’ny CHU sy CHRR ary ny fametrahana tahiry izay andraisana an-tanana maimaimpoana ny fitsaboana ireo zaza vao teraka sy ireo olona sahirana.

Raha ny fanazavana nomen’ny mpitsabo iray eo anivon’ny ministeran’ny fahasalamana dia amin’izao fahalanian’ny lalàna izao vao tena hanan-kery ny satan’ny tobim-pahasalamana isanisany. Ankehitriny koa vao azo dinihana ny famatsiam-bolan’ny hopitaly sy ny tombontsoa manokan’ireo mpiasa. Marihina anefa fa tsy maintsy mahazo ny fankatoavan’ny fahefana mpanao lalàna izay vao hanan-kery ity lalàna ity izany hoe : miandry ny fijoroan’ny Repoblika faha-4.

Tia Tanindrazana

Samia mijoro ho an'i Gasikara.