Actualités

Kaominina Ankiranomena Fenoarivobe Tsy hita izay fandrosoana, mitaraina ny mponina

Actualités
Sabotsy 25 Novambra 2017

Efa ho telo taona izao tsy misy endri-pampandrosoana hita taratra mihitsy eo anivon’ny kaominina ambanivohitra Ankiranomena, distrikan’i Fenoarivobe.

Tsy mandeha araka ny tokony ho izy ihany koa ny fidiram-bola eo anivon’ny kaominina, raha araka ny fitarainan’ireo solontenan’ny mponina izay tonga nitondra fitarainana teo anivon’ny minisiteran’ny Atitany omaly. Efa nisy, hoy Atoa Raherison Adele, solontenan’ny mponina ny resaka nifanaovana tamin’ny Ben’ny tanàna saingy zary lasa fifamaliana izay arahin’ny fanamparam-pahefana. Nisy moa ny fampisehoan’izy ireo ny taratasy nanangonan’ny mponina sonia omaly, narahin’ny fampisehoana ireo déliberation nataon’ny mpanolotsaina kaominaly izay nanambaran’ireto farany fa tsy misy ny fampandrosoana, tsy mety ny fiaraha-miasa ka tokony haato amin’ny asany ny Ben’ny tanàna. Miandry ny fanapahan-kevitra horaisin’ny fitondram-panjakana ireo mponina any amin’ity kaominina iray ity.

Pati