Actualités

Kaominin�i Toamasina I Olana goavana ny fandaminana ny tsenan�Ankirihiry sy ny fako

Actualités
Zoma 09 Jolay 2010

Mbola nibahana tamin’ny dinika namaranana ny fivoriana tsy ara-potoanan’ny mpanolotsaina monisipaly, izay naharitra telo andro, ny mikasika ny fako misavovona etsy sy eroa ao Toamasina ankehitriny sy ny fandaminana ny tsena lehibe eny Ankirihiry. Nampaneno lakolosy tamin’ny mpanatanteraka izy ireo mba hamahana haingana io loza mitatao amin’ny mponina io. Nilaza noho izany ny mpanatanteraka fa “efa misy ny ezaka goavana natao nanomboka ny alatsinainy amin’ny fanalana ireo fako miangona etsy sy eroa sy eny amin’ireo toerana fanariam-pako». Hanome tanana ny kaominina amin’izany orianasa SMMC sy ny SPAT. Mikasika ny olan’ny tsena indray dia mifampiampanga ny mpanatanteraka sy ny mpanolotsaina. Itsy voalohany milaza fa miaro ny tsy mpanara-dalàna ireto farany. Nitsipaka izany fiampangana izany avy hatrany moa ny mpanolotsaina.

Tetsy andaniny dia tsikaritr’ireo mpanolotsaina monisipaly fa tsy misy tetiandro mazava ny hamitana ny asa ao anatin’ny fandaharan’asa napetraky ny PDS Rakotovao Mariot. Roa no mety ho anton’izany na tahotra sao dia mifarana tampoka ny fotoam-piasana maha PDS azy, na tsy firaharahiana tsotra izao. Voatery nametraka fanamby anefa ny PDS rehefa noteren’ny mpanolotsaina fa ao anatin’ny telo volana dia tsy maintsy hilamina ny resaka fifamoivoizana ao Toamasina indrindra ireo posy sy posy bisikileta miasa ao an-tampon-tanàna, ka posy bisikileta miisa 5.000 manana laharana omen’ny Kaominina ihany no afaka hiasa. Mipetraka sahady anefa eto ny olana sy ny ahiahin’ny mpanolotsaina, satria efa mananiky ny 9.000 ireo mivelona amin’ny posy bisikileta vokatry ny krizy sy ny tsy fisian’ny asa ary ny fandroahana mpiasa samy hafa, ka dia ho hita eto ihany ny tohiny.

Jean D.