Actualités

Partagé sur :
• facebook

Atahorana hivadika ady an-trano ilay nahafaty an’i Tsiharagny Retana kandida ho ben’ny tanàna avy amin’ny fikambanana Firaisankina tany Ianakafy, distrikan’i Betroka.

Tsy faly  amin’izao namonoan’ny  sasany azy izao ny havan’ i Tsiharagny Retana  avy ao Sakamahily, kaominina  iray akaikin’i  Ianakafy ka tonga  nanao diabe  any an-toerana  ombam-basy ary  mikasa  ny hamaly  faty ny  havany. I Fety Mana ilay kandidan’ny  antoko Hvm  izay nibata ny  fandresena  tao Ianakafy  kosa dia re fa namonjy ny  tanànan’i Betroka  mba ho fiarovana ny ainy. Tsy misy  porofo ahazoana  mitana  ity kandidan’ny Hvm  ity ho  tompon’andraikitra  amin’izao  raharaha vono olona izao  saingy  noho izy mpifaninana mivantana amin’ilay kandida maty  dia tsy azo noferana ny ahiahin’ny  mponina ao Betroka, indrindra  fa ny ao Ianakafy.

 Araka ny vaovao  voaray ihany koa  dia nisy  olona roa  hafa  maty   taorian’io  namonoana ny kandidan’ny fikambanana Firaisankina io. Fomba  hanampenana ny  ratsy natao ihany anefa  izany, hoy ny sasany  mba hilazana fa tsy  misy  resaka politika io fa helok’ela  fotsiny  ihany. Ny hafa  kosa indray milaza  fa  ireo  roalahy maty taty afara ireo no nirahina namono ity kandida ity  ka mba hampanginana ny  raharaha no namonoana azy ihany koa. Mbola  mitohy ny fanadihadiana. Marihina fa misy rohim-pihavanana  ihany koa ity kandidan’ny  Firaisankina ity sy ny kandidan’ny Hvm

Andry Ratovo 

Tia Tanindrazana

Samia mijoro ho an'i Gasikara.