Actualités

Halatra miharo hosoka Fiara 4x4 sy Clio iray ifampitadiavana eny amin�ny Tribonaly

Actualités
Alarobia 14 Jolay 2010

Niakatra fitsarana ambaratonga voalohany tao Toamasina omaly ny fitoriana nataon�ny Dr Rakotomanana Gervais, Ben�ny tan�nan�i Toamasina teo aloha, nanenjehany vehivavy iray MC nampangainy ho nangalatra fiara renault Clio sy fiara 4x4 Nissan, miampy halatra sonia namoahana vola teo anivon�ny ACOA Robista Valpinson. Ny maraina no niditra teo anivon�ny fitsarana ny antontan-taratasy, saingy nifarana ny tolakandro vao nisy ny fanadihadiana.

Raha namoaka ny fehin-teniny ny lehiben’ny fampanoavana ny fitsarana ambaratonga voalohany Toamasina, dia nanenjika an’ilay vehivavy araka ny fitorian-dRakotomanana Gervais azy mikasika ny “fangalarana fiarakodia miisa roa, sy fanaovana sy fampiasana taratasy manokana hosoka ary miampy fangalarana sonia”. Nisy taorian’izay ny fidiran’ny raharaha teny amin’ny mpitsara mpanao famotorana. Raha ny mpitsara mpanao famotorana zokiolona no tokony ho nitazona ny raharaha amin’ny fanadihadiana, dia ny mpitsara mpanao famotorana voalohany indray no nihazona izany ny faran’ny tolakandro. Hatreto aloha, tsy fantatra mazava izay ho tohin’ny raharaha sy ny didy savaranonando navoakan’ny mpitsara mpanao famotorana voalohany mikasika an’ilay ramatoa satria ny mpisolovava raha nanontaniana dia sady tsy nanome fanazavana mazava no somary hendratrendratra ihany koa raha vao nanontanian’ny mpanao gazety. Ny hany fantatra dia mbola hitohy ny fanadihadiana.

Raha hiverenana ny tantara dia fanalahidy namboarina manokana no nakana ny fiara 4x4 teo ivelan’ny Lapan’ny tanànan’i Toamasina. Taorian’izay dia nivoaka teo anivon’ireo mpitandro ny filaminana ny fikarohana ny fiara sy ny fisamborana ny naka ny fiara. Taty aoriana vao fantatra fa teny Andoharanofotsy Antananarivo no nametrahana ny fiara roa dia ny nissan 4x4 sy renault Clio iray. Mitady ny fananany moa Rakotomanana Gervais ka miandry izay havoakan’ny fitsarana nanankinany ny famahana ny olana sy hamoaka ny tena marina rehetra momba izany.

Nangonin’i Jean D.