Actualités

GTT Frantsa sy Belzika Tadiavin�ny FAT hotakonana amin�ny fetifety ny fahorian�ny Malagasy

Actualités
Alakamisy 24 Jona 2010

Nanasa ny GTT Frantsa sy Belzika hiaraka hankalaza ny faha-50 taonan’ny fahaleovantena ny Ambasady Malagasy ao Parisy Frantsa. Tsy nanaiky ny fanasana anefa ny GTT. Ny antony, ho azy ireo dia “solontenan’ny fanjakana tsy ara-dalàna no mikarakara ka tsy ekena”. Fitadiavana fankatoavana no nandraisan’ny GTT ny niantsoana azy, ka dia nolaviny. Manazava izy ireo fa “tadiavin’ny FAT (Fahefana Avon’ny Tetezamita) takonana amin’ny fetifety ny fahorian’ny Malagasy izay ianjadian’ny fampihorohoroana, fanagadrana ny tsy manan-tsiny, fitazomana amponja ny tsy mitovy hevitra aminy”. Mampahatsiahy ny GTT Frantsa sy Belzika tamin’ny fanambarana niraisan’izy ireo fa “nanome vola 28 000 euros hanaovana fety ny FAT, ny Malagasy anefa mijaly tsy misy asa, tsy misy ho hanina, maro ny mamono tena, ny mivaro-tena, ny mangalatra, mba ho velombelona”.

Ho an’ny GTT dia “fankatoavana ny fanandevozana fa tsy fahafahan’ny firenena ity fety kasain’ny FAT hatao ity ka tsy azon’izy ireo ekena”. Na izany aza dia «tsy manome tsiny ireo Malagasy madinika mandray fanomezana, ianjadian’ny fahoriana, ka na fotsimbary iray sotro kely aza tsiponina, maika fa omena vary sy hena indray andro hanakonana ny fijaliana mandava-taona noho ny fitondrana ankehitriny”.

Na izany aza dia nilaza ireto GTT ireto fa tsy hanadino ny 26 jona saingy kosa haneho ny tsy fankasitrahana ny asan’ny FAT, izay ambarany fa «manapotika ny firenena ka mitady hanarona izany amin’ny fankalazana ny faha-50 taonan’ny fahaleovantena sarintsariny, sy ny faha-50 taonan’ny foloalindahy malagasy».