Actualités

Partagé sur :
• facebook

Ny 84%-n’ireo olona 2 500 nohadihadiana ny volana oktobra 2014 tamin’ireo toerana dimy hiasan’ny tetikasa no manaiky ny hitrandrahan’ny Toliara Sands fasimainty ao Ranobe. Io no tatitra navoakan’ny « Comité d’Enquête d’Audience Publique », komity mahaleotena nomen’ny ofisim-pirenena momba ny tontolo iainana alalana nanatontosa fanadihadiana fakan-kevitra nihainoana sy nangatahana ny soso-kevitry ny vahoaka. « Dingana tsy maintsy atao alohan’ny hahazoana ny «permis environnemental » na fahazoan-dalana hitrandraka ny fakan-kevitra », hoy ny ONE.

Resy lahatra ny vahoaka

«Ekenay mpitondra ara-drazana ny hitrandrahana fasimainty fa hitondra fampandrosoana sy fivoarana ho an’ny taninay sy ny taranakay ny tetikasa», hoy ireo olobe to teny mpitan-kazomanga.  «Manaja ny fifanarahana misy sy bokin’andraikitra izahay ho tombontsoam-bahoaka  sy fiarovana ny tontolo iainana», hoy i Rudy Fida Cyrille, mpandrindram-paritry ny Toliara Sands. Hialana amin’ny tsaho inian’ny sasany aely hanaratsiana endrika ny tetikasa dia misy ny fandraisana ireo fitarainana samihafa sy soso-kevitra ary misokatra foana ny adihevitra hirindran’ny tetikasa ho fanoitry ny fampandrosoana.

Fampandrosoana maharitra

Asa mivantana 250 no vokarin’ny tetikasa Toliara Sands. Hitombo ny vola miditra ao amin’ny kitapom-bolam-panjakana amin’ny alalan’ny hetra isan-karazany sy tamberi-bidy. Hatramin’ny taona 2001 no ho mankaty nanaovan’ity orinasa ity fikarohana dia vola mitentina 35 tapitrisa dolara amerikanina no efa laniny. Ny jolay 2014 teo no napetraka ny « Etude d’Impact Environnemental »-n’ny tetikasa niaraka tamin’ny fandoavana vola « Frais d’Evaluation » araka didy hitsivolana voafaritry ny MECIE. Tafapetraka ihany koa ny tetikasa fampandroasoam-paritra ka ny lehiben’ny faritra Atsimo Andrefana no filohan’izany.

Eric R.

Tia Tanindrazana

Samia mijoro ho an'i Gasikara.