Actualités

Fitifirana an'i Tsong Tsy hita ilay vehivavy niaraka taminy

Actualités
Zoma 12 Novambra 2010

Mbola mifonofono zavatra maro ilay resaka fitifirana teny Antsakaviro ka nahafaty an'i Tsong. Nisy vehivavy iray olon-tiany niaraka taminy teny ambony moto tamin'io fotoana io. Naseho ny mpanao gazety mihitsy izany teny amin'ny tranompatin'ny Hjra ny hariva nahafaty an'i Tsong. Hatramin'izay ka hatramin'izao anefa dia tsy nipoitra teny amin'ny zandary ity tovovavy ity. « Tamin'ny gazety no nahalalako izany. Tsy naterina taty aminay mihitsy izany tovovavy izany. Raha ny Fis no nahatratra azy dia tsy manan-jo hitazona olona ny Fis. Hatramin'izao aho anefa tsy mahalala mikasika izany », hoy ny kolonely Ravalomanana Richard raha nanontaniana mikasika ity tranga ity. Ny mahavarina amin'ity tranga ity dia na ny havan'ilay tovovavy ihany koa aza dia tsy misy mahasahy mipoitra hilaza ny amin'ny havan'izy ireo. « Tokony hialana ny toe-tsaina tsy maty manota na iza izy na iza. Rehefa manao zavatra dia raisina ny andraikitra sy ny vokatr'izany. Amiko, na iza manao hadisoana na iza dia manolotra izany ny Fitsarana no anjaranay », hoy ihany ny kolonely Ravalomanana Richard. Ho hita eo moa ny tohin'ity raharaha ity.