Actualités

Fitaterana anabakabaka Hiala eto Madagasikara ny Corsair ?

Actualités
Alatsinainy 07 Janoary 2013

Marisarisa ny fitaterana ana habakabaka eto Madagasikara.

Toarian’ny olana nianjady tamin’ny orinasam-panjakana Air Madagascar, ka tsy nahafahan’ireo boeing roa an’ity kaompania nasionaly ity hisidina ny lanitr’i Eoropa dia mandeha indray koa ny feo ankehitriny fa hiala/hoesorina eto Madagasikara ny kaompania Corsair. Mifamahofaho be ihany ny resaka manodidina azy ity, ary sarotra ny mahazo fanampim-baovao mikasika izany. Ny tsiliantsofina re dia ato anatin’ny enim-bolan’ny taona 2013 ity no (mety) hialan’ity kaompania vahiny ity.

Raha ny zava-misy eny Ivato anefa dia saika feno hatrany ity zotra ity, izay mampifandray amin’i La Réunion sy mankany Frantsa ihany koa. Marihina fa tsy maintsy mahazo alalana amin’ny ACM (Aviation Civile de Madagascar) ireo fiaramanidina sy kaompania misidina ny lanitr’i Madagasikara. Na izany aza ireo mpahay momba ny fitaterana ana habakabaka dia milaza fa mety ho ao ambadik’izao ny kaompania Air France, izay maka toerana tsikelikely eto, ary mety hamafa tanteraka koa ny fisian’ny kaompania nasionaly Air Madagascar. Ity farany izay misedra olana ara-bola goavana. Fiaramanidina miisa telo izao no mihitsoka fa tsy misy motera, noho io olana ara-bola io.

Nangonin’i Britto