Actualités

Fitantanam-bolan’ny kaominina Nahazo fiofanana ireo ben’ny tanàna

Actualités
Talata 17 Aprily 2018

Misy ny fiofanana maharitra 5 andro omena ireo ben’ny tanàna tetsy amin’ny hotely Le Pavé Antaninarenina. Nanomboka omaly izany ary ireo manampahaizana manokana momban’ny fitantanana ara-bola eto Madagasikara sy any ivelany no mitondra ny traikefany.

Tanjona ny ahafahana mametraka sy mamehy ny paikady rehetra amin’ny resaka fitantanam-bola eny anivon’ny kaominina. Ben’ny tanàna na solontenan’ny ben’ny tanàna na tompon’andraikitra ara-bolan’ny kaominina no ofanina. Manampy amin’ny fananganana tetikasa sy fiaraha-miasa amin’ireo mpiara-miombon’antoka fa indrindra ny mpamatsy vola ity fampiofanana ity. Sakana ho an’ny kaominina mantsy ny tsy fahaiza-manao sy ny tsy fahaiza mitantana tetikasa rehefa tojo famatsiam-bola ary indrindra tsy mahavita tena ihany koa ny kaominina ka tokony hitady fidiram-bola hatrany. Nentanina araka izany ireo kaominina mbola misalasala sy tsy rototra ka tsy nanao fangatahana ho amin’ity fiofanana ity. Tsy maintsy napetraka 2 na 3 volana mialoha mantsy ny fangatahana izay vao afaka misitraka izany. Vitsivitsy araka izany ireo kaominina tonga niofana kanefa betsaka ny tombony azo amin’ity fiofanana amin’ny fitantanam-bola ity.

Tsiry