Actualités

Partagé sur :
• facebook

Nibaribary loatra ny karazan’olona tsimatimanota eto Madagasikara, tao anatin’ny raharaha Claudine Razaimamonjy, hoy ny filohan’ny Sendikan’ny mpitsara eto Madagasikara (SMM) halina tao anatin’ny fandaharana Donakafon’ny Top radio 102.8 FM.

 Ny fahefana mpanatanteraka mihitsy no manao angaredona niaro an’i Claudine R, hoy izy. Nambaran’ny filohan’ny SMM fa namoaka vava Rtoa Claudine hoe « … izaho tsy azonareo samborina, tsy azonareo tsaraina, tsy azonareo gadraina. ». Tsy tokony hanaiky lembenana amin’izany isika Malagasy rehetra fa mijoro kosa hanohitra ny tsy rariny ary samy mitondra ny anjara birikiny amin’ny fametrahana ny fanjakana tsy tan-dalàna ka tsy ampiharina ny didim-pitsarana, hoy izy. Efa tena mihoatra ny ambaran’ny lalàna ny fe-potona nipetrahan’ity mpandraharaha sady mpanolotsain’ny filoha ity eny amin’ny hopitaly, hoy i Fanirisoa Ernaivo ka mety aminy ny miditra eny am-ponja amin’izay aloha dia azo atao ny fitsirihana sy fizahana ara-pahasalamana tsy mitanila. Mahitsy sy hentitra tsara kosa ny tenin’ny filohan’ny SMM manoloana ny senatera Riana Andriamandavy. « Misy fotoanany ny zava-drehetra, miandry kely aloha fa tsy maintsy atao ny fandaminana. Raha efa izahay mpitsara ve no mitory an’io senatera io dia mbola holazaina indray fa tsy azo raisina ny dosie ? », hoy izy. Tsy maintsy ho avy  ny anjarany fa resaka fotoana fotsiny io. Matoa mihetsika sy manara-maso tahaka izao ny SMM dia mino sy mahatoky fa hisy vokany ny zavatra ataony mba hametrahana ny tany tan-dalàna ka izay rehetra voaporofo fa nandika lalàna dia faizina araka ny lalàna.Tsy sinema ny an’ny SMM fa tena hanao izahay, hoy ny filohany ary nanentana hatrany ny olom-pirenena tsirairay amin’ny andraikitra tandrify azy moa i Fanirisoa Ernaivo mba tena handray andraikitra tokoa fa tsy ho mpitazana na mpanakiana fotsiny.

RTT

Tia Tanindrazana

Samia mijoro ho an'i Gasikara.