Actualités

Partagé sur :
• facebook

Tapaka tanteraka ny herinaratra teto Antananarivo renivohitra sy tamin’ny faritra maro manodidina azy, ny alarobia alina nanodidina ny tamin’ny folo ora. Nanaitra ny rehetra izany satria tsy ao anatin’ny fahavaratra intsony isika izao no sady tsy nisy fampandrenesana avy amin’ny Jirama mialoha io fahatapahana io. Omaly maraina dia nandeha ny resaka fa toa hoe tafiditra tao anatin’ny tetika ho fanafihana ny tobin’ny FIGN etsy Fort Duchesne iny fahatapahan’ny herinaratra tampoka iny. Misy amin’ireo miaramila mbola miandany amin’i Andry Rajoelina mantsy no mieritreritra fa vahaolana ny manafika sy mambabo ireo lakazerina izay tsy mankasitraka 100% ny FAT amin’izao fotoana, ka anisan’izany ny FIGN izay toa tsy mitsahatra maneho hevitra an-gazety tsy manaraka ny fitsipika ara-miaramila. Mijanona ho siosion-dresaka fotsiny ve sa tena mitombina tokoa ity fikasan’ireo miaramilan-dRajoelina hanafika ny FIGN ity ? Hatramin’ireny fitakiana ny famoahana ny marina mikasika ilay vola 500 tapitrisa ariary avy any amin’i Marc Ravalomanana ireny mantsy no efa nandeha ny resaka fa tsy mifankahazo tsara intsony amin’ny filohan’ny HAT sy ireo miaramila miaro azy ity hery vonjitaitran’ny zandarimariam-pirenena ity. Saingy efa nilaza ampahibemaso moa taorian’izany ny lehiben’ny FIGN ny jeneraly Zafera fa tsy mikasa ny hanongam-panjakana izany mihitsy ny eny Fort Duchesne. Fa tena arakarak’izany fanambarana izany tokoa ve ny zava-misy marina ? Ho hita eo ihany ny tohiny !

Tia Tanindrazana

Samia mijoro ho an'i Gasikara.