Actualités

Fanondranana olona an-tsokosoko Malagasy roa voasambotra atsy Mayotte

Actualités
Talata 25 Aogositra 2015

Ny eo tratra, ny hafa misisika hatrany ! Tsy hay tohaina ny firongatry ny mpitsoa-ponenana miondrana an-tsokosoko mankatsy Mayotte

, nosy izay miankina amin’i Lafrantsa. Raha ny filazan’ny gazety Mayotte Matin izao dia nisy 10.000 no tratra saika hiditra an-tsokosoko tany Mayotte ka naverina tany amin’ny firenena niaviany, izay Kaomaorianina sy Malagasy ny ankamaroany. Ny avy eto Madagasikara dia vao nisy 12 indray tratra tamin’ny zoma 21 aogositra teo. Nentina tamin’ny sambokely mirefy 9m, niala avy any Nosy-Be izy ireo, namakivaky ranomasina 330km no saron’ny polisy mpiaro ny sisintany mahorey teny afovoan-dranomasina. Nahitana fonosana rongony milanja 50kg niaraka tamin’izy ireo. Tamin’ny fanadihadiana savaranonando nataon’ny polisy mahorey azy ireo no nahalalana fa 2 tapitrisa Ariary (700 euros) isan’olona no saran’ny fanondranana. Naverina aty Madagasikara izy 12, notazonin’ny polisy hanaovana fanadihadiana kosa ireo 2 lahy nitondra azy ireo.

Jean D.