Actualités

Fanomanana CEPE Atao letrezana ny fampidirana ao antsain�ny ankizy ny amin�ny tetezamita

Actualités
Alarobia 12 Mey 2010

Mitaraina ireo ray aman-dreny manan-janaka hanala fanadinana CEPE amin’ity taona ity fa ataon’ny mpanabe sasany letrezana ny fampidirana ao an-tsain’ny zanak’izy ireo ny resaka politika. Ho an’ireo ray aman-dreny mipetraka eny Andohatapenaka eny, tafaresaka tamin’ny Tia Tanindrazana dia mitaraina mafy izy ireo fa misy fikendrena ny handetika ao an-dohan’ny mpianatra madinika, izay tsy mahalala akory izay politika, ny amin’izao fitondrana tetezamita izao, amin’ny fanontaniana mandritra ny fanazarana. Nasehon’izy ireo an-taratasy mihitsy ny santionany amin’ny fanontaniana toy ny fitakiana amin’ny mpianatra ny daty nametrahan’ny filoha Marc Ravalomanana fialana, toy izany koa ny fangatahana amin’ny mpianatra ny daty nisian’ny fitifirana ny mpanao fihetsiketsehana teny Ambohijatovo, ny datin’andro nihaonan’ny ankolafy efatra tany Maputo sy Addis Abeba ary koa ny fitakiana amin’ny mpianatra ny hanomezana ny anaran’ny Praiminisitra talohan’i Monja Roindefo. Izay ny any am-pianarana fa misy amin’ireo boky fanomanana fanadinana CEPE amidy eny amin’ny fivarotam-boky ireny koa no manome vahana ny resaka politika, indrindra ny fitondrana tetezamita amin’ny fanontaniana apetrany. Efa nitranga izany tamin’ny laza adina BEPC taona 2009, nitakiana tamin’ny mpianatra ny zava-bitan’ny tetezamitan-dRajoelina. Toa efa omanina ho amin’izany ny sain’ny mpanala CEPE raha izao no fisehony.

Nangonin’i Jean D.