Actualités

Fankalazana ny 26 jona Navitrika ny vehivavy tao Toamasina

Actualités
Alatsinainy 28 Jona 2010

Tsy nahasakana ny mponin�i Toamasina hanamarika araka izay azony atao ny fahatsiarovana ny faha-50 taona nahazoana ny fahaleovantena ny orana izay somary nahazo vahana ihany ho an�iny tapany Atsinanana iny nandritra ny andron�ny fankalazana ny fetim-pirenena ny andron�ny 26 jona mihitsy.

Nandray anjara tamin’ny matso, izay naharitra ora telo teo, natao teo amin’ny araben’ny fahaleovantenan’i Toamasina daholo na ny tafika, na ireo mpianatra na ny fikambanam-behivavy ireo olona tra-pahasembanana ary ireo mpanao fanatanjahantena aman’orinasa lehibe ao an-tampon-tanàna. Fa tsy diso anjara koa ny antoko sy fikambanana politika nahitana ny Tgv, ny Mts ny Mdm ny Fimami ary ny Ampela manao politika. Tsikaritra ho maro an’isa kosa ny vehivavy mandray anjara tamin’ny matso nataon’ny sivily tamin’ny sokajy rehetra, ary saiky nanjaka tanteraka tamin’ny fanamian’izy ireo ny lokon’ny sainam-pirenena nisy mihitsy aza ny andriambavilanitra nisafidy ny hianjaika amin’ny akanjo miloko fotsy mena maitso. Raha nanontaniana moa dia nambarany fa dia fanaporofoany ny fitiavan-tanindrazana sy ny hafaliany noho izao asaramanitra izao no mahatonga izany. Ho an’ny “Trois Mouvances” kosa na nikasa ny hilahatra aza tsy nahazo nanao izany fa voarara mialoha ny fandraisany anjara fa nokilasiana ho mpanakorontana.

Hita taratra nandritra ny matso natao ny fahantran’ny Malagasy amin’izao fotoana izao. Raha fitafiana vaovao sy mba miavaka no fahita hatramin’izay mandritra ny matso, tamin’ity taona ity dia akanjo motraka sy fitafy antitra no nataon’ny ankamaroan’ny mpilahatra na sivily izany na ny foloalindahy. Teo ny fientanam-pon’ny mpanao matso fa hita soritra ihany koa ny hakiviana amin’ny fahantrana mahazo ny ankamaroan’ny olona.

Teny amoron-dranomasina indray ny tolakandro no niarahan’ny mponin’i Toamasina nijery ny tarika vahiny Kassav, tetsy an-daniny ny fandefasana ny afomanga ny alin’ny 26 Jona. Raha fehezina dia samy nianoka tanatin’ny fahafaha-manaony momba ny fanamarihana ny faha-50 taonan’ny fahaleovantena ny rehetra.

Ny tsikaritra fotsiny tamin’ny fotoana fitondran’ireo ankizy ny arendrina dia nahazo vahana ny jiro vita endrika sy karazan-kilalao nohazavaina tamin’ny jiro takamoa mifahana vatoaratra madinika ary zara raha tazana ny iray sy roa teo anatrehan’ny maro ny fanala na arendrina taratasy sy ny jiro kapoaka nalaza fahiny.

Raha fehezina dia nilamina ny fety teo Toamasina renivohitra, na teo aza ny orana, ny Alahady 27 Jona kosa vao nirosoana ny fametrahana mari-boninahitra ireo tokony ho nomena izany ny andron’ny 26 Jona.

Fanja Toamasina