Actualités

Partagé sur :
• facebook

Mpikambana maro eo anivon’ny ACOA famonjena no tsy afaka maka ny volany ara-dalàna teo anivon’ny Caisse efa ho telo volana. Araka ny fanazavana azo eo anivon’ny mpikambana vaky taraina dia manana olana ara-bola ity ACOA Famonjena ity, noho ilay raharaha fifandroritana eo amin’izy ireo sy ny tambajotra Littoral.

Amin’izao ankatoky ny fidiran’ny mpianatra izao dia miantso vonjy ny mpikambana tompom-bola sy manana tahiry rehetra fa “hanao fitokonana izy ireo raha tsy voavaha haingana izao olana mikasika ny vola tahiriny izao, mba entina hanomanana ny fidiran’ny mpianatra sy hikarakarana ny fiainana iray manontolo”. Betsaka ny dingana sy fandeferana natao amin’ny fikaroham-bahaolana araka ny nambaran’ireo mpikambana. Nisy fotoana koa aza dia ny fanjakana mihitsy no nanampy azy ireo tamin’izao fahasahiranana ara-bola izao saingy tsy mbola nahitana vahaolana maharitra izany hatramin’izao. Araka ny fanazavana azo sy nangonina dia “vokatry ny fampindramam-bola nataon’ny ACOA Famonjena tamin’ny ACOA Modely sy SEPT ACOA, izay tsy naha-tafaverina ny vola nampindramina no niteraka ny olana ho an’ny mpampindrana”; manginy fotsiny ny vola mihitsoka any amin’ny banky sy ny Trésor.

Manaitra ny sain’ny tomponandraiki-panjakana ireo mpikambana very vola ireo, mba hikaroka vahaolana amin’ity raharaha ity, satria mahatratra 19.000 eo ho eo ny mpikambana ao anatin’ity ACOA Famonjena ity, izay misandrahaka amin’ny faritra Atsinanana sy Analanjirofo, ka hanahirana ihany raha hitokona an-dalambe hitaky ny fananany sy ny volany izy ireo. 

Tia Tanindrazana

Samia mijoro ho an'i Gasikara.