Actualités

Fampielezan-kevitra Tsy mahavoa-drindrina ireo mpanohana ny ENY ao Antsirabe

Actualités
Zoma 15 Oktobra 2010

Tsy mbola niantsehatra tao Antsirabe mihitsy hatreto ireo mpanohana ny ENY na dia efa roa herinandro aza izay no nanombohan’ny fampielezan-kevitra mikasika fitsapan-kevi-bahoaka momba ny lalàmpanorenana. Na ny tabilao manoloana ny biraon’ny Faritra sy ny Distrika aza dia ny efitra natokana ho an’ny fanjakana ihany no mba misy afisy kely fa ny ankoatra izay dia mbola babangoana tanteraka. Nisy ihany fizarana ny takelaka misy ny tolo-dalàna momba ny lalàmpanorenana saingy vitsy izany ary saika ireo sampandraharaham-panjakana ihany koa no nomena fa tsy ny sarambabem-bahoaka. Araka ny fantatra dia tsy misy sahy midina any amin’ny Fokontany ireo mpanohana ny ENY sao tsy mahavory olona na hitsanga-menatra ka aleo aloha mamitsaka. Raha ny zava-misy dia tsy mbola hita taratra ao Antsirabe mihitsy aloha ny hoe fisiana fifidianana raha atao indray mijery amin’izao fotoana izao, na ny fananganana ny mpikambana amin’ny biraom-pifidianana aza dia ny alahady ho avy izao no hiantsoana fivoariambem-pokonolona ka asa raha toa ka hahavory olona indray na tsia fa dia ho hita eo. Ny zavatra hita ihany koa dia ny Distrika no miezaka mametaka afisy miendrika Naoty fanaikana ny mpifidy eran’ny elanelan-tranon’Antsirabe fa tsy mbola nisy famorian-bahoaka nataon’ny mpanohana ny ENY mihitsy aloha.

Nangonin’i Jean D.