Actualités

Fampanambadiana ny zaza tsy ampy taona Mamolavola paikady hiadiana aminy ny ministeran’ny mponina

Actualités
Talata 21 Novambra 2017

Mahatratra 41,2% ny tahan’ireo ankizy tsy ampy taona efa miroso amin’ny fanambadiana manerana ny Nosy ankehitriny.

Eo anelanelan’ny 11-15 taona ireo zazavavy kely lasibatra, 14-17 taona kosa ireo zazalahy. Tena misy akony ratsy eo amin’ny tontolon’ny fivoaran’ny zaza tsy ampy taona anefa io tranga io amin’ny ankapobeny sady tsy hahafahan’ny fiarahamonina mivoatra ihany koa. Antony nanosika minisiteran’ny mponina sy ny fiahiana ara-tsosialy ary ny fampiroboroboana ny vehivavy hamolavola drafitra nasionaly miaraka amin’ireo mpiara-miombon’antoka aminy. Manodidina 29 miliara sy 430 tapitrisa Ar ny vola natokana ho amin’izany hatramin’ny taona 2024. Tontosa omaly alatsinainy ny atrikasa nankatoavana io drafitra vaovao io, tohanan’ny UNICEF. Tanjona ny hahafahana mampihena ny tahan’ny fampanambadiana zaza tsy ampy taona eto amintsika, indrindra fa ny any amin’ny faritra. Marihina fa niainga tamin’ny fanadihadiana sy ny fidinana ifotony nijerena ny zava-misy isam-paritra, indrindra ny firesahana tamin’ireo ankizy lasibatry ny fanambadiana aloha loatra sy ireo lalàna iraisam-pirenena ary ireo lalàna anatiny no nandrafetana ity drafitra nasionaly ity. Olona 4.000 avy amin’ny faritra enina no voakasiky ny fanadihadiana tamin’ny ankapobeny.