Actualités

Partagé sur :
• facebook

Nihena hatrany amin’ny antsasany ny fanampiana ara-bola avy any ivelany tao anatin’ny herintaona. Raha nahatratra 698 tapitrisa dolara ny totalin’ny vola azon’ny fanjakana tamin’ny taona 2008 dia tsy nisy afa tsy 372 tapitrisa dolara izany tamin’ny taon-dasa.

Ireo tetikasa momba ny fiahiana ara-tsosialy sy ny vonjy aina, izany hoe ny sehatry ny fahasalamana sy ny fampandrosoana ny tontolo ambanivohitra no saika notazonin’ireo mpiara-miombonantoka amin’ny ankapobeny. Araka ny tatitra moa dia 100 tapitrisa dolara monja no vola indramina tamin’iny 2009 fa fanampiana tsy averina avokoa ny ambiny rehetra. Na dia nampiato tetikasa sy fandaharanasa maro aza ny fanjakana amerikana hatramin’ny nisian’ny fanonganam-panjakana dia izy ireo no nanome famatsiana ara-bola be indrindra amin’ny fiarahana miasan’ny firenena samy firenena. Nanamarika ny taona 2009 koa anefa ny fisian’ireo mpamatsy vola vaovao dia ireo firenena aziatika izany. “Tsotra kokoa ny fepetra takian’ireo firenena mpiara-miasa vaovao ireo toa an’i India sy Koweit ary Arabia Saodita”, hoy ny ministry ny toekarena, Fienena Richard. Singanina manokana ny fanjakana Indiana dia nandany 24 tapitrisa dolara tamin’ny fanatsarana ny voka-bary sy ny famokarana zezika. Raha ny tatitra ihany dia hita ho manomboka marindrano noho ny tamin’ny taona 2009 ny fanampiana azon’i Madagasikara tamin’ny enim-bolana voalohany satria mitentina 172 tapitrisa dolara ny totalin’ny fanampiana azontsika nandritra io fe-potoana io. 360 tapitrisa dolara kosa no andrandraina hatramin’ny faran’ny taona 2010. Raha ny fanamarihan’ny ministra ihany dia efa mihamiverina ny mpiara-miombonantoka amintsika satria efa mizotra amin’ny fiverenana amin’ny ara-dalàna ny firenena amin’izao fotoana. 

Tia Tanindrazana

Samia mijoro ho an'i Gasikara.