Actualités

Faha-50 taonan�ny fahaleovantena Tsy dia nahasarika olona firy ny fanokafana

Actualités
Alatsinainy 21 Jona 2010

Raha atao indray mijery dia nangingina ihany ny fanombohana ny fankalazana ny faha-50 taonan’ny fahaleovantena ny sabotsy lasa teo. Karnavaly nitety ny renivohitra ary niainga teny amin’ireo boriborintany enina moa no notanterahana tamin’izany, nahitana mpanakanto, fikambanana maro, mpianatra ary olon-tsotra. Tamin’ny mitatao vovonana no samy niainga tamin’ireo toerana efa nifanomezany avy ny isaky ny boriborintany. Nisy avy eo ny diabe niarahana teny Antanimena, Soarano, Analakely, ary dia raikitra ny fampisehoana hiragasy sy vakodrazana teo amin’ny Esplanade Analakely sy teny amin’ny kianjan’Ambohijatovo. Nitotorebika ihany koa ny teny Anosy sy ny manodidina tamin’ny alalan’ireo «podium» sy fanentanana maro samihafa. Nihetsika mafy tokoa ary nanao izay tratry ny heriny ny fitondrana tetezamita sy ny kaominin’Antananarivo renivohitra tamin’ity fanokafana ny fankalazana ny faha-50 taonan’ny fahaleovantena ity, saingy tsikaritra ho tsy dia nanintona olona firy izany, ary tsy maro mpanaraka ny karnavaly. Ny olona rahateo moa nanararaotra ny andro sabotsy tsy fiasana hitadiavana izay hanin-kohanina. Hanomboka amin’ity herinandro ity ireo fampisehoana nambara fa goavana, nanasana manokana mpanakanto avy any ivelany, fampisehoana izay samy tsy misy handoavam-bola avokoa.

RTT