Actualités

Partagé sur :
• facebook

Nisokatra ny alatsinainy hariva teo ny e-bit 2010 izay hetsika manome lanja manokana ho an’ny teknôlôjia avo lenta. «Hub» no anarana nampisalorana ity andiany ity izay anomezan-danja bebe kokoa ny fahaizamanao mampiasa ny «fibre optique».

Raha ny tenin’i Alain Razafindrabe, Talen’ny Synergy Communication nandritra ny lanonam-panokafana dia «ny fanapariahana ireo karazana teknôlôjia vaovao sy ny fanamorana ny fahazoan’ireo mpanjifa azy ireny no fanamby tian-kotratrarina amin’ny hetsika». Misy moa ny fanehoana mivantana amin’ny alalan’ny «écran géant» ny haitao hiaka farany. Raha ny fandaharam-potoana indray dia natokana ho an’ny mpandraharaha ny talata sy alarobia, ny «Ebit show» ny alakamisy raha anjaran’ny mpianatra kosa ny zoma ary ho an’ny daholobe ny roa andro farany. Nanamarika ity E-bit 2010 ity ny havitsian’ireo orinasa mpandray anjara mahazatra. Tsy manana tranoheva eny an-toerana, ohatra, ny orinasa zain, ny telma, ny moov, ny blueline ary ny concept izay azo lazaina fa orinasa lehibe amin’ny sehatra misy azy avy. Zara raha misy koa anefa ireo orinasa vahiny. Anisan’ny mitondra zava-baovao, ohatra, ny Beyal Group avy atsy Mayotte izay vao nanangana masoivoho eto amintsika ary manantena hameno ny tsena. Mivarotra fitaovana mandamina ny filaharana rehefa mamonjy birao ka ialana amin’ny fisisihana ity orinasa ity. Raha ny zava-nisy omaly ihany koa dia vitsy dia vitsy ireo mpandraharaha nitsidika ireo tranoheva. Ho hita eo indray ireo andro manaraka.

Tia Tanindrazana

Samia mijoro ho an'i Gasikara.