Actualités

Partagé sur :
• facebook

Nialoha ny namonjeny ny lanonana fankalazana ny fetim-pirenena Frantsay teny Ivandry, omaly zoma faha-14 jolay, dia mbola nandray ireo mpikambana vitsivitsy avy ao amin’ny SMM teny amin’ny Lapan’i Mahazoarivo ny praiministra Mahafaly Solonandrasana Olivier.

Naharitra ora 1 mahery kely ny fihaonan’izy ireo nefa dia tsy nisy fanambarana nivoaka taorian’izany fa io izy maika ny hamonjy lanonana io. Somary nandosindositra “micro” an’ny mpanao gazety ihany koa ireo mpikambana ao amin’ny SMM nihaona taminy fa ny filoha lefiny, Atoa Clément Jaona, no nanamarika tamin’ny mpanao gazety fa fampahatsiahivana tamin’Atoa praiministra ny zavatra nambarany mikasika an-dry zareo SMM no fototry ny dia nalehan-dry zareo tao amin’ity tompon’andraiki-panjakana ity. Nambaran’ity filoha lefitry ny SMM ity fa toherin-dry zareo marin-drano ny filazan’ity praiministra ity fa manao “destabilisation” na fanakorontanam-panjakana izy ireo. Nampahatsiahivinay azy koa ny teniny nilaza fa : “tapitra hatreo ny fanaovana fitaovana politika ny fitsarana”. Mbola nambaranay tamin’ity praiministra Malagasy ity koa, hoy Atoa Clément Jaona, tokony handray andraikitra (prend acte) amin’ny fanatanterahana didy navoakan’ny fitsarana izy. Efa mazava amin’ny rehetra kosa ny fitakiana ataonay izay miompana amin’ny tokony hampiarana amin’izay ny fahaleovan-tenan’ny fitsarana eto amintsika.

Ntsoavina Evariste

Tia Tanindrazana

Samia mijoro ho an'i Gasikara.